Berti Foqts yanlış, Rəşad Sadıqov düzgün seçim etdi

Xəbər verdiyimiz kimi, ötən gecə futbol üzrə Argentina yığmasının və İspaniyanın “Barcelona” klubunun hücumçusu Lionel Messi FİFA-nın versiyasına görə ardıcıl dördüncü dəfə dünyanın ən yaxşı futbolçusu adına – “Qızıl Top”a layiq görüldü. Azerisport.az xəbər verir ki, respondentlərin 41,6 faizi məhz argentinalı futbolçuya səs veriblər.

 

İkinci yeri Portuqaliya yığmasının və İspaniyanın “Real” klubunun hücumçusu Kristiano Ronaldo tutub - 23,68 faiz. Üçüncü yeri isə İspaniya millisinin və “Barcelona”nın yarımmüdafiəçisi Andres İnyesta tutub – 10,91.

 

Maraq üçün bildirək ki, dünyanın ən yaxşı futbolçusunun müəyyənləşdirilməsindən Azərbaycan yığmasının baş məşqçisi ilə kapitanının da iştirakı olub. Belə ki, Berti Foqtsla Rəşad Sadıqov da səsvermədə iştirak ediblər. Yığmamızın almaniyalı çalışdırıcısı birinci yerə Andres İnyestanı, ikinci yerə Kristiano Ronaldonu, üçüncü yerə isə Xavi Ernandesi (Barcelona, İspaniya) layiq görüb. Qalib Messi isə heç onun ilk üçlüyünə də düşməyib.

 

Sadıqova gəlincə, o, dünyanın ən yaxşı futbolçularını tam dəqiqliklə müəyyənləşdirib. Belə ki, “Qarabağ”ın kapitanı birinci yerə Messini, ikinci yerə Ronaldonu, üçüncü yerə isə İnyestanı layiq görüb.