Rodriqinyo: Neftçidə ailəmə görə oynayırdım

“Neftçi”nin sabiq yarımmüdafiəçisi Rodriqinyo Braziliyanın B Seriyasında çıxış edən “Sport Resife” klubuna keçidi öncəsi mətbuat konfransı keçirib. Azerisport.az xəbər verir ki, o, Azərbaycan klubuna keçidindən də danışıb.

Maraq üçün qeyd edək ki, Braziliya klubunun fanatları Rodriqinyonun yenidən bu komandaya qayıtmasını o qədər də xoş qarşılamayıblar. “Neftçi”nin sabiq futbolçusu 2006-cı ildə də “Sport Resife”də çıxış edib. Rodriqinyo öncə azarkeşlərin bu reaksiyasına münasibət açıqlayıb:

“Bu cür münasibəti normal qarşılayıram. Çünki mən bu klubu artıq bir dəfə tərk etmişdim. İndi yenidən komanda üçün nə edə biləcəyimi demək istəməzdim. Hər şeyə meydanda aydınlıq gələcək. Bilirəm ki, “Sport”un tərəfdarları çox fanatikdilər”.

30 yaşlı futbolçu Azərbaycanı seçməsinin səbəblərindən danışarkən bunları dilə gətirib: “Futbol onda yaxşıdı ki, orda hər cür imkanlar var. Məni tənqid edənlərin ağzını bağlaya bilmərəm. Ancaq sizin futbol oynamaq, həyatda lazım olan qazancı əldə etmək, ailəni təmin etmək şansınız varsa, onda sənə ödəniş edən kluba kömək etmək olar”.

 

Qeyd edək ki, braziliyalı yarımmüdafiəçi “Neftçi”də uzun müddət zədəli olduğundan meydana çıxmadı. Elə məhz bu üzdən də paytaxt klubu Rodriqinyo ilə yolları ayırmağa qərar verdi.