Bakı Kamran Ağayev və Rauf Əliyevlə müqavilə bağlamaq üzrədi

“Bakı” “Qarabağ”ın hücumçusu Rauf Əliyev və “Xəzər Lənkəran”ın qapıçısı Kamran Ağayevi heyətinə qatmağa yaxındı. Azerisport.az xəbər verir ki, paytaxt klubu hər iki futbolçu ilə yaxından maraqlanır və danışıqlar aparır.

 

Bunu saytımıza müsahibəsində klubun vitse-prezidenti Zeynal Məmmədov da təsdiqləyib: “Raufla Kamranın komandamıza keçidi zaman məsələsidi. Biz artıq müqavilənin detallarını da razılaşdırmışıq. Hər iki futbolçu “Bakı”da oynamağa razıdılar. Qalır sadəcə klubun prezidenti Hafiz Məmmədovun razılıq verməsi. Hazırda o, ölkə xaricindədi. Yəqin ki, axşama yekun qərarını açıqlayacaq. Klubumuzun prezidenti yığma üzvlərinə həmişə diqqətlə yanaşır. O, bu transferin əleyhinə olmayacaq”.

Məmmədovun sözlərinə görə, futbolçuların razılığın aldıqdan sonra “Bakı” artıq qarşı tərəflə - klublarla da danışıqlara start verib. O, hansısa problemlə üzləşəcəklərini istisna edir.

Maraq üçün qeyd edək ki, Rauf Əliyev “Qəbələ”dən də təklif almışdı. Amma göründüyü kimi, o, bölgə təmsilçisini yox, paytaxt klubunu seçib.

Məmmədov komandadan gedənlərdən də danışıb. O, bildirib ki, baş məşqçi Bojidar Bandoviç Cəmşid Məhərrəmov və Ramazan Abbasovdan imtina edib. Hər iki futbolçu transfer vərəqini alıb və hazırda azad agent statusuna malikdilər.