Fərhad Vəliyev: Qarabağa qapıçı lazım deyil

“Qarabağ”ın qapıçısı Fərhad Vəliyev azerisport.az saytına müsahibəsində 2012-ci ili dəyərləndirib, eləcə də komandasının heyəti ilə bağlı fikirlərini açıqlayıb.

 

- Necə istirahət etdiniz?
- Çox yaxşı. Ailəmlə birgə Türkiyəyə getmişdim. Özümü yaxşı hiss edirəm. Artıq məşq etməyə hazıram.
 

- İndi Türkiyədə daha 26 gün keçirməlisiz...

- Düzünü deyim ki, məşqlər üçün çox darıxmışam. İstirahətin son günlərində hazırlıqlarımızın başlamasını səbrsizliklə gözləyirdim. Bizi çətin il gözləyir. Ona görə də qarşıdakı oyunlara ciddi hazırlaşmaq lazımdı.

 

- 2012-ci il sizin üçün nə ilə yadda qaldı?
- Mən bu ili iki hissəyə ayırardım. Birinci hissəsi mənim üçün uğursuz alındı. Çünki mən böyük zaman kəsiyində ehtiyatda qalmalı olurdum. Amma sonralar hər şey qaydasına düşdü. Artıq daha çox oynayıram. Lakin məni hər şeydən çox narahat edən məqam avrokuboklara vəsiqə qazana bilməməyimiz oldu.

 

- 2013-cü ildən nə gözləyirsiz?
- Şübhəsiz ki, ilk növbədə Azərbaycan çempionatının qalibi olmaq istəyirəm. Bunu çoxdan gözləyirəm. Özümdən isə sabit oyun və milliyə qayıtmağı gözləyirəm.

 

- “Qarabağ”ın yeni transferlərə ehtiyacı varmı?
- Düzünü deyim ki, belə sualları heç vaxt xoşlamamışam. Bunu baş məşqçiyə ünvanlamaq daha yaxşı olardı. Əlbəttə, bir-iki oyunçu almağımız bizə problem yaratmaz. Amma bunsuz da yaxşı heyətimiz var. Xeyli gənc və perspektivli futbolçumuz var.

 

- Hansı mövqelərə güclənmək lazımdı?
- Mənim üçün fərqi yoxdu. Ümumiyyətlə, mən belə hesab edirəm ki, maksimum bir oyunçu almaq olar.

 

- O da yəqin ki, dəqiq qapıçı deyil...

- “Qarabağ”a qapıçı dəqiq lazım deyil. Kifayət qədər qapıçımız var.

 

- Sizcə, Türkiyə toplanışı zamanı daha çox güclü komandalarla oynamaq faydalıdı, yoxsa ortabab və ya zəif klublarla?
- Güclü komandalara qarşı oynamaq mənim daha çox ürəyimcədi. Çünki belə rəqiblərlə sınaq matçlarının böyük faydası olur. Lakin məşqçilər korpusu fərqli məqamları da nəzərə ala bilər. Axı komandanı onlar hazırlaşdırırlar.