"Litvalılar Azərbaycana getməkdənsə, Avropaya üz tutsalar, daha yaxşı olar”

Futbol üzrə Litva yığmasının baş məşqçisi Çobo Laslo yetirmələrindən bəzilərinin klubsuz qalmasına münasibət bildirərkən onların Azərbaycana getməsini arzulamadığını dilə gətirib. Azerisport.az xəbər verir ki, o, ölkə mətbuatına müsahibəsində öncə bunları söyləyib:

“Hazırda mən intizarla Tadas Labukas və Artur Rimkyaviçyusdan xəbər gözləyirəm. Arturun Şotlandiya “Harts”ı ilə müqavilə bağlaya bilməməsinə çox təəssüfləndim. Yığmanın baş məşqçisi kimi, mənim üçün bütün yetirmələrimin daimi iş yerlərinin olması, öz klublarında mütəmadi oyun keçirməsi çox vacibdi”.

 

“Onların Azərbaycan və ya Qazaxıstan kimi ölkələrə getməsinə sevinərsizmi” sualına Laslo belə cavab verib:

“Hamıya yaxşı məlumdu ki, bu ölkələrdə yaxşı pul qazanmaq olar. Bəli, futbolun səviyyəsi də pis deyil. Amma şəxsən mən litvalı oyunçuları Avropada görmək istəyirəm. Belə olan halda həm onları izləmək asan olar, həm də yığmanın prestiji qalxar. Bununla Azərbaycanda və ya Qazaxıstanda çıxış edən futbolçulara heç nə demək istəmirəm. Sadəcə, mən istəyirəm ki, bütün yetirmələrim öz çıxışlarını yaxşılaşdırsınlar”.

 

Litva millisinin çalışdırıcısı onu da bildirib ki, AZAL-da çıxış edən Andryus Veliçka Azərbaycana gələndən sonra pis oynamağa başlayıb: “Mən sizə adi bir misal da göstərə bilərəm. Veliçka ötən mövsüm “Ekranas”da çıxış edirdi. Onu həqiqətən də bəyənirdim, Rusiya və Belarusla görüşlərdə özünü çox yaxşı tərəfdən göstərmişdi. O, yığmanın əsl lideri idi. Amma Azərbaycana getməsi ilə hər şey qurtardı. Yeni klubunda yalnız sonradan meydana çıxır və fərqlənmir. Ən pisi də odu ki, bu, onun yığmadakı çıxışına da təsirsiz ötüşmür”.

Sonda bir məqamı da qeyd edək ki, Laslo deyəsən, Veliçkanın 33 yaşının olmasını unudub. O, heç Azərbaycan Premyer Liqasının Litva çempionatında xeyli öndə olmasından da xəbərsizdi.