“Futbolu seçməsəydim yəqin ki, ticarətçi olardım”

“Kəpəz”in kapitanı Azər Məmmədov klub saytında “Tam sərbəst” adlı rubrikanın qonağı olub. Azerisport.az xəbər verir ki, təcrübəli oyunçu futboldan kənar sahələrdən danışıb, bizləri təəccübləndirməyi bacarıb.

 

Kino

Açığı, televizora elə də çox baxan deyiləm. Bu vaxtla bağlı deyil. Sadəcə olaraq, indiki filmlərin əvvəlinə baxanda axırını bilmək olur. Çoxu maraqsızdı. Amma maraqla baxdığım filmlər də var. “Axırıncı aşırım” belə kinolardandı. Nə vaxt versələr, oturub baxıram. Dəfələrlə baxmağa belə hazıram. Çünki o bədii filmdə kişi üçün böyük dərs var. Ona görə bu əsəri yüksək qiymətləndirirəm.

 

Avtomobil

Avtomobil həvəskarı deyiləm. Amma hamı kimi mən də yaxşı maşın sürmək istəyərəm. Bahalısı olmayananda da hec vaxt heyfislənməmişəm. Yaxşısını almışam, bir az sürüb satmışam da. Sürətli sürməklə də aram yoxdu. Avtomobil idarə edərkən qaydaları pozmamağa çalışıram. İlk avtomobilim Rusiya istehsalı olan “VAZ 2107” markalı olub. Onda 26 yaşım vardı. Sonra “VAZ 21 099” aldım. Tədricən digər ölkələrin istehsalı olan avtomobillərə keçdim. Bu mənada ilk olaraq “Volkswagen Golf5” markalı maşın aldım. Ardınca “İnfiniti” sürdüm. Hazırda sürdüyüm isə Almaniya istehsalı olan “Mercedes E 240” markalı avtomobildi.

 

Dəb

Sözün düzü, geyimdə rənglərə fikir vermirəm. Yəni bu mövsümün dəbdə üstünlük yaşıladırsa, hökmən yaşıl geyinməliyəm və ya göydürsə, göy. Yox, mən belə şeyləri ciddiyə almasam da, həmişə çalışıram ki, yaxşı və səliqəli geyinim. Səliqəli geyinməyi daha çox xoşlayıram. Bir söz var ki, deyirlər insanın ayaqqabısının təmizliyinə baxıb səliqəli olub-olmadığı haqda qərar verirlər. Çalışıram geyindiklərim təmiz olsun. Hərdən dükanlara girib, brend olan firmalardan mal alıram. Amma xoşuma gələn halda. Xoşuma gəlmirsə, nə olsun ki, brenddir? Ümumiyyətlə, nə olsa geyinirəm. Yaraşandan sonra nə geyinsəm, özümə uyğun olacaq.

 

Siyasət

Siyasətlə heç maraqlanmıram. Mənlik deyil. Çətin işə bənzəyir.

 

Peşə

Futbolu seçməsəydim yəqin ki, ticarətçi olardım. Bu peşə mənə daha yaxındır. Özümə iş-güc qurardım. İstərdim dükanım, restoranım və ya ofisim olsun. Sakitcə öz işimlə məşğul olardım. Sərbəst iş qrafiki seçərdim ki, mənə işə nə vaxt gəlib-getməklə bağlı göstəriş verən olmasın. Necə deyərlər öz əlim, öz başım olardı.

 

Uşaqlar

Həddindən artıq uşaqcanlıyam. Ən kədərli vaxtında belə uşaqlar insanın əhval-ruhiyyəsini müsbətə doğru dəyişə bilər. Tək öz övladlarımı deyil, bütün uşaqları sevirəm.Üç uşağım var. Hələ onlar məndən şikayət etməyiblər. Onlara heç vaxt əl qaldırmamışam. Bəziləri deyirlər ki, guya uşağı vurmaqla tərbiyələndirmək olar. Mən belə düşünmürəm və bununla razı deyiləm.