14 yanvar 2013 14:28
Böyükağa Hacıyev: Yazdığımız tarixin davamını gətirməliyik
"Neftçi"nin baş məşqçisi Böyükağa Hacıyev komandanın Antalya hazırlığı barədə klubun rəsmi saytına danışıb. Azerisport.az xəbər verir ki, o, bunları dilə gətirib:
"Qış fasiləsindən ən yaxşı şəkildə yararlanmaq istəyirik. Məşq keçdiyimiz "Mardan" İdman Kompleksində bunun üçün hər bir şərait yaradılıb. Hər gün 2 məşqimiz olur - səhər və axşam. Hazırlığın ilk mərhələsi əsasən fiziki tapşırıqlardan ibarətdir. İkinci mərhələdə isə daha çox taktiki-texniki məsələlərə diqqət ayıracağıq. Bir neçə gənc futbolçu da əsas komanda ilə hazırlığa qatılıb. Bu da onların təcrübə qazanması və yaxın gələcəkdə əsas heyətin üzvünə çevrilməsi üçün bir şansdır. Hazırlıq müddətində yoxlama oyunları da keçirəcəyik. Antalya təlimlərindən sonra komanda daha yaxşı səviyyədə olacaq. Məqsədimiz ardıcıl üçüncü dəfə Azərbaycan çempionu olmaqdı. Ölkə kubokunda da eyni dərəcədə iddialıyıq. Avrokuboklarda yazdığımız tarixin davamını gətirməliyik".
