Turanda beş yeni futbolçu

“Turan” mövsümün qalan dövrü üçün hazırlıqlara start verib. Azerisport.az xəbər verir ki, komanda Tovuzda hazırlaşır.

Artıq bölgə klubu baxışa dörd futbolçu da dəvət edib. Onların hamısı Ukraynadan gəlib. Kiyev “Dinamo”sunun yetirməsi olan Pavel Yançukla yanaşı Aleksey Radoviç, Amberk İncibaşvili və Yaroslav Suxanov da Tovuz klubunda özünü göstərməyə çalışacaq.

Baş məşqçi Əfqan Talıbov onlarla bağlı fikirlərini açıqlayıb: “Onların hamısı azad agentdilər və baxışda olacaqlar. Bu futbolçuları yoxlama oyunlarında da sınaqdan keçirəcəyik. Vüsal Hüseynovu da baxışa çağırmışıq. Ender Günlü ilə Salif Ballo komandada qalacaq. Fərid Quliyevin aqibətinin necə olacağı isə hələ dəqiq deyil. Mümkündü ki, o, komandadan getsin”.