İnter Antalyaspor və Olimpiklə qarşılaşacaq

Ötən mövsümdə U-17 Azercell Liqasının çempionu olan "İnter"in 17 yaşlılardan ibarət komandası çempionatının ikinci dövrəsinə hazırlıq məqsədilə Türkiyəyə yola düşəcək. Azerisport.az xəbər verir ki, AFFA tərəfindən gerçəkləşdiriləcək səfərdə 20 futbolçu iştirak edəcək.

 

Toplanışda iştirak edəcək 20 nəfərdən 15-i 1996-cı il təvəllüdlü, digər 5-i isə 1997-ci il təvəllüdlü futbolçulardı. Komanda Türkiyədə Antalyanın Lara bölgəsində yerləşən 4 ulduzlu "Hadrianus" otelində məskunlaşacaq. Toplanış yanvarın 20-də başlayacaq və ayın 30-na kimi davam edəcək.

 

Qeyd edək ki, Arif Əmirxanovun yetirmələri toplanış çərçivəsində 2 yoxlama görüşündə qüvvəsini sınayacaqlar. Yanvarın 25-də "İnter" "Antalyaspor" klubunun U-17 komandası ilə qarşılaşacaq, iki gündən sonra futbolçular Gürcüstanın "Olimpik" (Tiflis) klubunun U-17 komandası ilə üz-üzə gələcəklər.