20 yanvar 2013 00:11
Bakı Bolqarıstan klubuna qarşı hansı heyətlə mübarizə aparıb?
Xəbər verdiyimiz kimi, Antalyada təlim-məşq toplanışında olan “Bakı” hazırlığın 5-ci günü ilk yoxlama oyununa çıxıb. Azerisport.az xəbər verir ki, yerli vaxtla 15:30-da (Bakı vaxtı ilə 17.30) başlanan qarşılaşmada rəqib Bolqarıstanın "Etir" klubu idi.
"Zolaqlılar" “Rixos Premium” otelinin meydanında baş tutan oyuna bu heyətlə çıxıb: Edin Nuredineski, İbrahim Karqbo, Denis İvanov, Elşad Manafov, Anatoli Stukalov, Elvin Əliyev, Junior Xavyer, Aleksandar Şoliç, Novruz Məmmədov, Əziz Quliyev, Nurlan Novruzov.
Oyun qarşılıqlı hücumlarla başlayıb. Bolqarısatn təmsilçisi ilk hücumların birində hesabı açmağa müvəffəq olub. Bu, qarşılaşmanın 15-ci dəqiqəsinə təsadüf edib. Tədricən, hücumlarının kəsərini artıran “Bakı” 38-ci dəqiqədə bu qolun cavabını verib. Nurlan Novruzov cavab qolunu vurub. İlk hissə bu hesabla başa çatıb.
İkinci yarıda komandanın baş məşqçisi Bojidar Bandoviç meydana tamamailə yeni heyət buraxıb. Start heyətindən Yalnız Nuredineski oyuna davam edib. Fasilədən sonra Edemir Rodriqes, Aqil Nəbiyev, Şəhriyar Əliyev, George Popxadze, Asani, Tural Qürbətov, Deyvidas Çesnauski, Novruz Məmmədov, Rəhman Hacıyev və Ramazan Abbasov oyuna qoşulublar.
Komandamızın cəhdlərinə və əldə etdiyi qol imkanlarına baxmayaraq ikinci hissədə hesab dəyişməyib və "Bakı" ilk yoxlama oyununu 1:1 hesablı bərabərliklə başa vurub.
