24 yanvar 2013 11:54
“O, hazırda Azərbaycanı seçir, ancaq ümid edirəm ki, Rusiya yığmasında oynayacaq”
Rusiyanın “Zenit” klubunun ikinci komandasının baş məşqçisi Anatoli Davıdov azerisport.az saytına müsahibəsində “Qəbələ”nin əvəzedici heyəti üzərində qazandıqları qələbədən danışıb, Elvin Bədəlov və MDB çempionatı barədə fikirlərini açıqlayıb.
- Dünənki oyun xoşunuza gəldi?
- Hər iki komanda yaxşı oynadı. Açıq-aşkar görünürdü ki, “Qəbələ” bizə qalib gəlmək istəyir. Biz azca mütəşəkkil idik və komandanın qarşılıqlı əlaqəsi bizdə daha yaxşı idi. Sevinirik ki, belə rəqibimiz vardı. “Qəbələ”nin oyunçuları texnikalıdır. Oyunun sonunda sərt oyun getdi. Bu bizi əsəbiləşməyə sövq etdi. Komandanızı başa düşmək olar - 0:3 hesabı ilə məğlub olurdular. Ancaq ümumilikdə bir-birlərinə hörmətlə yanaşırdılar.
- Ümumilikdə Azərbaycan komandası xoşunuza gəldi?
- Yaxşı komandadır. Mütləq lider çatışmır. Kollektivi ardınca apara biləcək futbolçu görmədim. Belə isə cənub komandaları həmişə maraqlı olub. Özüm tez-tez onlara qarşı oynamışam. Təəssüf ki, indi biz eyni çempionatda deyilik. Arada nostaljiyə qapılıram. Müxtəlif üslubda oynayan komandalara qarşı oynamaq həmişə maraqlı idi.
- Deməli, siz ötən ilin sonlarından KİV-də müzakirə olunan MDB çempionatının tərəfdarlarındansınız?
- Əgər bu, maraqlı olacaqsa, niyə də yox?
- Bəs bu mümkündür? Yeri gəlmişkən, təşəbbüs Sankt-Peterburqdan gəlib.
- Burada yalnız peterburqluların rolu yoxdur. Bu ideya çoxdan danışılır. Görək, hər şey necə olur.
- Siz Azərbaycan və Ermənistan klublarının oyunlarını necə təsəvvür edirsiniz?
- Burada nə var ki?
- Münasibətlər, yumşaq desək, elə də yaxşı deyil.
- Bu elə də yaxşı tarix deyil. Bunu aradan qaldırmaq lazımdır. Çox xalqlar arasında xoşagəlməz hallar var. Milyon illər ədavət aparmaq olmaz. Gec-tez münasibətlər sülh yolu ilə yaxşılaşmalıdır. Mən siyasətin idmana müdaxiləsini tərəfdarı deyiləm.
- Elvin Bədəlov haqda fikirləriniz necədir?
- O, mənim xoşuma gəlir. Xarakteri olan oğlandır. Dünən onu “Rubin”in əvəzedicilərinə qarşı meydana buraxdım. Pis oynamdı.
- Yaxın vaxtlarda onun perspektivləri necədir?
- Bu haqda danışmaq tezdir. “Zenit”də çıxış edən bütün uşaqlar perspektivlidir. Biz bunun üzərində çalışırıq.
- O, Sankt-Peterburqda doğulub və 17 ildir ki, orada yaşayır. Buna baxmayaraq seçimini Azərbaycan yığması üzərində saxladı və gənclərdən ibarət yığmada (U-19) çıxış edir. Buna necə baxırsınız?
- O, hazırda Azərbaycanı seçir, ancaq ümid edirəm ki, gələcəkdə Rusiya yığmasında oynayacaq. Xətrinizə dəymək istəmirəm, ancaq hələ ki, Rusiyada futbol Azərbaycandakı futboldan güclüdür. Onun iki vətəni var, ancaq hazırda yaşadığı ölkə üçün oynamaq daha nüfuzludur.
