25 yanvar 2013 03:37
“Azarkeşlərdən ayrılmaq heç də asan olmadı”
Hazırda təlim-məşq toplanışı üçün Bakıda olan "Kəpəz" ev oyunlarını paytaxtda "Dalğa Arena"da keçirəcək. Azerisport.az xəbər verir ki, Gəncə klubu bununla bağlı Peşəkar Futbol Liqasına məktub ünvanlayıb.
Bölgə təmsilçisinin bu addımı atmasına səbəb Gəncə şəhər stadionun ot örtüyünün yararsız, həmçinin tribunalardan bəzisinin qəzalı vəziyyətdə olmasıdı. "Kəpəz"in əvəzedici heyəti isə ev matçlarını Şəmkir Olimpiya İdman Kompleksinin stadionunda keçirəcək.
Bu məsələ ilə bağlı klubun icraçı-direktoru Adil Tağıyev klubun rəsmi saytına açıqlama verib: "Çox təəssüf ki, Gəncədə oynaya bilməyəcəyik. Komandamız ev görüşlərini ölkə paytaxtında keçirəcək. Əvvəllər bu barədə yalnız söz-söhbətlər gedirdisə, indi məsələ dəqiqləşib. Stadionumuzdakı qazonun vəziyyəti yaxşı deyil və bu cür ot örtüyündə futbol oynamaq mümkünsüzdür. PFL rəhbərliyi ilə bir müddət əvvəl danışıb, məsləhətləşmələr apardıq. Yekunda Bakıda oynamağı seçdik. "Dalğa Arena"ya üstünlük verdik. Futbol azarkeşlər üçündür və biz fanatlarımızı itirmək istəmirik. İnanırıq ki, onlar bizim atdığımız addımı anlayışla qarşılayacaqlar. Gəncədən, azarkeşlərdən ayrılmaq heç də asan olmadı. Əvəzedici heyətimiz isə Şəmkirdə oynayası oldu. Qonşu rayondakı arenanın rəhbərliyi ilə görüşdük və onlar "dubl"a ev oyunlarının təşkilində kömək edəcəklər".
