26 yanvar 2013 02:29
Qəbələ Volınla oyunda hansı futbolçuları sınaqdan keçirdi?
Xəbər verdiyimiz kimi, Anatlayada hazırlıqlarını davam etdirən "Qəbələ" ötən gün qardaş ölkədə ikinci yoxlama oyununu keçirib. Azerisport.az xəbər verir ki, Ukrayna "Volın"ı ilə üz-üzə gələn “qırmızı-qaralar” 2:1 hesabilə qalib gəliblər.
"Qəbələ" meydançaya aşağıdakı start heyətlə çıxıb: Anar Nəzirov, Deyan Kelhar, Omar Kalabane, Daniel Kruz, Pulhak, Ceyhun Sultanov, Yannik Kamanan, Emeqara, Luka Jinko, Valentiç, George Vasiliu.
Matç Ramiz Məmmədovun yetirmələrinin üstünlüyü ilə başlayıb. Ardıcıl hücumlar 13-cü dəqiqədə öz bəhrəsini verib. Qapıçı ilə üzbəüz qalan Yannik Kamanan topu tora göndərib - 1:0. Hissənin sonlarına doğru fəallığını argtıran "Volın" hesabı bərabərləşdirməyə müvəffəq olub - 1:1.
İkinci hissəyə də üstün başlayan tərəf "Qəbələ" olub. Rəqibi təzyiq altında saxlayan qırmızı-qaralar 62-ci dəqiqədə hesabda irəli çıxıblar. Oyuna ikinci yarıda daxil olan Viktor Mendi başla dəqiq oynayıb - 2:1. Final fitinə kimi hər iki tərəfin fərqlənmək imkanı olsa da, hesab dəyişməyib və qırmızı-qaralar qarşılaşmadan qalib ayrılıblar.
