27 yanvar 2013 02:27
Xəzər Lənkəranın Timisoara ilə oyununda nələr baş verdi?
Üçüncü yoxlama oyununa çıxan "Xəzər Lənkəran"ın bugünkü rəqibi Rumıniyanın Timişoara klubu oldu. Azerisport.az xəbər verir ki, güclü leysan altında keçən qarşılaşmada komandamız 0:2 hesabı ilə məğlub oldu.
Baş məşqçi Karles Bakes meydana aşağıdakı heyəti buraxmışdı: Orxan Sadıqlı, Elnur Allahverdiyev, Vanderson Skarduelli, Manuel Skarlatake, Rahid Əmirquliyev, Roberto Alviz, Kamran Abdullazadə, Elnur Abdullayev, Adrian Pit, Sadio Tounkara və Gökhan Güleç.
Qeyd etmək lazımdı ki, matç ərzində rəqibini bütün parametrlərdə üstələyən komandanın sadəcə bəxti gətirmədi. “Ağ-yaşıllar” ilk hissədə ciddi təhlükə yarada bilməsə də, topa nəzarət tamamilə “Xəzər Lənkəran”ın tərəfində idi. İkinci hissədə isə Rumıniya təmsilçisinin müdafiə xətti üç epizodda qapıya gedən topu qapı xəttindən çıxardısa, bir epizodda da yeni transfer Marin Orsuliçin cərimə zərbəsindən endirdiyi zərbə qapı tirinə tuş gəldi. Bundan başqa Dimitrios Sialmas, Kazım Kazımlı və Elnur Cəfərovun yaratdıqları təhlükəli vəziyyətləri də qeyd etməyə dəyər. Bununla belə komanda israrla qol vurmaq istəyinin acısını çəkdi. Rəqib komanda cənubluları əks hücumda yaxalayaraq 2:0 hesabı ilə qalib gəlməyi bacardı.
Xatırladaq ki, yoxlama oyunun 46-cı dəqiqəsindən etibarən Marin Orsuliç və baxışda olan qapıçı Filip Lonçariç meydanda mübarizə apardılar.
