27 yanvar 2013 03:02
AÇ-2020 Avropanın müxtəlif ölkələrinin 13 şəhərində keçiriləcək
AÇ-2020 Avropanın müxtəlif ölkələrinin 13 şəhərində keçiriləcək. Azerisport.az xəbər verir ki, bununla yanaşı, yarımfinal və final oyunları eyni stadionda olacaq.
Avropa çempionatının hər hansı bir ölkədə və ya iki qonşu ölkədə (Polşa və Ukraynada olduğu kimi) keçirilməsindən imtina edilməsi ideyası UEFA-nın prezidenti Mişel Platiniyə məxsusdu. Artıq məlumdu ki, ingilislər turnirin üç əsas oyununun “Uembli”də keçirilməsini təklif ediblər. İngiltərə yığmasının meydanı bu hüquq uğrunda Roma, Berlin, Madrid, İstanbul və digər şəhərlərin stadionları ilə rəqabət aparacaq.
Platini İstanbul stadionunu dəstəkləyib. Lakin Türkiyə 2020-ci il Olimpiya Oyunlarının keçirilməsi hüququnu qazanarsa, onun bu arzusu reallaşmaya bilər.
Əgər “Uembli” ilə bağlı təklif qəbul edilməzsə, onda bu stadion qrup mərhələsi oyunlarının, həmçinin 1/8 və 1/4 final oyunlarına iddia edəcək. UEFA qrup oyunları və dörddə bir final mərhələsinin keçirilməsi üçün Avropanın ən azı 50 min tamaşaçı tutan 10 stadionunu seçəcək. Bundan başqa, futbol rəsmiləri daha sadə şəhərləri də cəlb etmək istəyirlər - 30 min tamaşaçı tutan daha iki meydan nəzərdən keçiriləcək.
Yarımfinal və final oyunlarının keçiriləcəyi stadion ən yüksək tələblərə cavab verməli və tutumu 70 min nəfərdən az olmamalıdı.
Hər ölkə yalnız bir meydan ilə təmsil oluna bilər. Buna görə də, UEFA finalın keçirilməsi üçün “Uembli”ni seçərsə, onda İngiltərə qrup mərhələsi oyunlarına həsrət qalacaq.
Beləliklə, AÇ-2020 Avropanın qrup mərhələsinin üç oyunundan və bir play-offdan 12 əsas “paketi” əldə edən 12 şəhərində keçiriləcək, 13-cü şəhərə isə yarımfinallardan və finaldan “eksklüziv paket” nəsib olacaq.
