30 yanvar 2013 00:18
Qarabağın Makedoniya klubu ilə oyununda nələr baş verdi?
Xəbər verdiyimiz kimi, “Qarabağ” ötən gün Türkiyədə keçirdiyi təlim-məşq toplanışı çərçivəsində 4-cü yoxlama oyununa çıxdı. Azerisport.az xəbər verir ki, Ağdam klubunun rəqibi Makedoniya çempionatında 2-ci pillədə qərarlaşmış “Turnovo” idi.
Qeyd edək ki, bu, artıq milllinin düşərgəsinə yollanan milli futbolçuların – Maksim Medvedev, Bədavi Hüseyinov, Qara Qarayev, Vüqar Nadirov, Vaqif Cavadovun Antalyada sonuncu hazırlığı idi. Komandanın baş məşqçisi Qurban Qurbanov adı çəkilən futbolçuları Bədavi xaric hamısını əsas heyətə salmışdı.
Ümumiyyətlə, “Ekranas”la baş tutmuş sonuncu yoxlama görüşüylə müqayisədə start heyətində 2 dəyişiklik vardı. Muaremi Əfran, Mironu isə Fərhad əvəzləmişdi.
Bakı vaxtıyla 17:00-da görüş start götürəndə əsl futbol havası vardı. İlk dəqiqələrdən “Qarabağ” topa nəzarət etsə də, makedonlar daha çox geridən oynadıqlarına görə qapı önündə ciddi təhlükələr qeydə alınmadı. Vüqar və Vaqifin bir neçə həmləsi ilk yarıda yadda qalan məqamlar oldu.
“Qarabağ” 2-ci yarıya 4 dəyişikliklə başladı. Vüqar, Maksim, Teli, Namiqin yerinə Subaşiç, Muarem, İlqar, Bədavi oyuna daxil oldu.
2-ci hissədə ərazi üstünlüyünü ələ alan “Qarabağ” ilk yarıyla müqayisədə rəqib qapısı önündə daha təhlükəli həmlələri ilə yadda qaldı. Özəlliklə, Vaqifin sola çəkilməsi, İlqarın sağ cinahdan hücumlara dəstək olması oyuna rənglilik qatırdı. Öncə Əfran qola yaxın oldu. Amma boş qapı önündə topa ayaq qoya bilmədi. Eyniylə İlqar Qurbanov qapıçıyla duelə yollansa da son zərbəni endirə bilmədi. Ansi Aqollinin yerinə meydana daxil olan Təmkin Xəlilzadə topu qazanaraq Vaqifi 2 dəfə əks-hücum şansı yaratsa da, son zərbə gəlmədi. Düzdü, sona 5 dəqiqə qalmış Vaqif hesabı açmağa borclu idi. Amma Riçardın ötürməsiylə Vaqif qapıçıyla təkbətək çıxıb topu qolkiperin başı üzərindən tora göndərmək istəsə də, hədəfdən azacıq aralı keçdi.
Belədə, oyundan qol səsi çıxmadı. “Qarabağ”ın 4-cü hazırlıq matçında 0:0-lıq nəticə qeydə alındı.
