30 yanvar 2013 11:56
“Növbəti turlarda tam fərqli Rəvan görəcəyik”
"Rəvan” mövsümün qalan hissəsinə hazırlıq davam etdirməkdədi. Azerisport.az xəbər verir ki, artıq 3 yoxlama oyunu keçirən komanda fevralın 9-nu səbirsizliklə gözləyir. Axı məhz həmin tarixdə çempionat yenidən "diriləcək”.
Bu arada komandanın baş məçqçisi Ramil Əliyev klubun rəsmi saytına müsahibəsində hazırlıqdan danışıb: "Çempionata ciddi hazırlaşırıq. Ağır məşqlərdən sonra 3 yoldaşlıq oyunu keçirdik. Nəticə baxımından o qədər də ürək açan olmadı, çünki son iki oyunumuzda heç-heçə oynadıq. Amma futbolçuların əzmkalığı, mübarizliyi xoşumuza gəldi. Hazırda yeni futbolçuların uyğunlaşma prosesi gedir. Buna görə də hələ komandaya tam adaptasiya olmamaları tam təbii haldır. Yeni transferlərimiz komandanı gücləndirəcək səviyyədədir. Növbəti turlarda tam fərqli "Rəvan” görəcəyik”.
Zədəli futbolçuların olmamasına sevindiyini deyən baş məşqçi artıq indidən növbəti mövsüm üçün daha iddialı komanda qurmağın zəruriliyini bildirib. Əliyev komandanın cari mövsüm üçün iddialarından da danışarkən belə deyib: "Çempionatda hələ ilk "6-lığ”a düşmək şanslarımız qalır. Bu üzdən bütün matçlarda qələbəyə oynamalıyıq. Düzdür, taleyimiz öz əlimizdə deyil. Ancaq sona qədər mübarizə aparacağıq. Artıq indidən növbəti mövsüm daha iddialı komanda olmaq işinə başlamalıyıq. Bunun təməlini indidən qoymaq lazımdır. Hazırda bizim üçün prioritet təbii ki, ölkə kubokudur. Bu turnirdə mümkün qədər irəli getməyə çalışacağıq. Rəqib güclü komanda olsa da, heç kimdən qorxmuruq, çəkinmirik”.
Qeyd edək ki, “Rəvan” Azərbaycan kubokunun ¼ final mərhələsində "Xəzər Lənkəran”la üz-üzə gələcək. Bu oyunlar 27 fevral və 7 mart tarixlərində baş tutacaq
