31 yanvar 2013 02:22
“Başını qaldırıb görürsən ki, getmək vaxtıdı”
“Kəpəz”in kapitanı Azər Məmmədovun futbolçu karyerasını başa vurduğu haqda xəbər vermişdik. Azerisport.az xəbər verir ki, 36 yaşında yaşıl meydanlara əlvida deyən müdafiəçi verdiyi qərardan danışıb.
“Futbolçu həyatı elə də uzun deyil. Hər bir şeyin sonu olduğu kimi futbolçu karyerasının da sonu var. Bir müddət oynadıqdan sonra başını qaldırıb görürsən ki, getmək vaxtıdı. Düşündüm və bu addımı atdım. Karyeramı bitirmək qərarına gəldim. Düzünü desəm, hələ oynaya biləcəyimi düşünürdüm. Amma getməyi qətiləşdirdim”, deyə Məmmədov bildirib.
Futbolçu həyatı ilə vidalaşsa da, Azər “Kəpəz”i tərk etməyib. O, klubda qalaraq, məşqçiliyə başlayıb: “Klub rəhbərliyi mənə məşqçi işləməyi təklif etdi. Futbolu sevirəm və karyeramı bitirdikdən sonra da bu sahədə çalışmağı istəyirdim. Belə də dəvəti qəbul etdim. Artıq işimin başındayam. Əvəzedicilərlə çalışıram. Bu işə qol qoymuşamsa, çalışacağam ki, uğur qazanım”. (klubun saytı)
