31 yanvar 2013 03:12
Xəzər Lənkəranın Zimbru ilə oyununda nələr baş verdi?
Xəbər verdiyimiz kimi, ötən gün "Xəzər Lənkəran" dördüncü yoldaşlıq oyununu keçirib. Azerisport.az xəbər verir ki, “ağ-yaşıllar”ın rəqibi Moldovanın yüksək liqa təmsilçisi "Zimbru" klubu olub.
Qeyd etmək lazımdır ki, "Xəzər Lənkəran"ın bütün sınaq oyunlarında olduğu kimi, bu qarşılaşma da leysan altında keçdi. Komanda meydana bu heyətlə çıxdı: Orxan Sadıqlı, Elnur Allahverdiyev, Manuel Skarlatake, Vanderson Skarduelli, Alvaro Silva, Adrian Pit, Marin Orsuliç, Elnur Abdullayev, Uğur Pamuk, Dimitrios Sialmas və Gökhan Güleç.
Oyunun ilk hissəsində “Xəzər Lənkəran” oyununu tapa bilmirdi. Hücum qurmağa bir neçə cəhd edilsə də, bu, bir nəticə vermirdi və həmin həmlələrin qarşısı rəqib tərəfindən tez alınırdı. Rəqib isə daha cəld davranırdı və sürətli əks hücum qurmaqda çətinlik çərmirdi. Bunun nəticəsində 18-ci dəqiqə cənublular qapılarında qol gördülər.
Həmin qolun əvəzini "Xəzər Lənkəran" oyunun təxminən 85-ci dəqiqəsində çıxa bildi. Adrian Pit rəqib qapıçısı ilə təkbətək çıxaraq topu tora qovuşdura bildi. Görüşün son dəqiqələrində isə yenidən hücuma keçən komanda ikinci qolunu vuraraq hesabda önə çıxdı. Gökhanın gözəl zərbəsini "Zimbru"nun qapıçısı dəf etdi və qayıdan topu baxışda olan qvatemalalı hücumçu Henri Lopez təkrar zərbə ilə qapıdan keçirdi. Beləliklə matç 2:1 hesabı ilə "Xəzər Lənkəran"ın xeyrinə başa çatdı.
