“Altıncı yer Xəzər Lənkəran üçün deyil”

“Xəzər Lənkəran”ın yarımmüdafiəçisi Adrian Pit azerisport.az saytının suallarını cavablandırıb.

 

- Moldovanın “Zimbru” klubu üzərində qazandığınız qələbə (2:1) haqda nə deyə bilərsiz?

- Bizim üçün bu oyunda qələbə qazanmaq çox vacib idi. Çünki əvvəlki oyunlarımızda məğlub olmuşduq. Nəticə həmişə önəmlidi. Hətta belə oyunlarda da.

 

- Bəs əvvəlki məğlubiyyətlərə nə səbəb oldu?
- Biz həmin dövrdə fiziki hazırlıqlara daha çox diqqət ayırırdıq. Mümkündü ki, məhz bunun yorğunluğu çıxışımıza təsirsiz ötüşmürdü.

 

- Deməli, “Krivbass”dan altı qol buraxmağınızın da yeganə səbəbi bu idi?
- Onlardan beşini demək olar ki, özümüz heç nədən buraxdıq. Çox sadə qollar buraxırdıq. Ona görə belə böyük hesabla məğlub olduq.

 

- “Xəzər Lənkəran”ın hazırkı durumunu necə qiymətləndirirsiz?
- Qarşıda daha bir oyunumuz var. Oyun keyfiyyətlərimizi yaxşılaşdırmalıyıq. Qələbə də qazana bilərik, uduza da. Bundan ciddi heç nə yoxdu. “İnter”lə çempionat oyununda qələbə qazanmaq bizim üçün daha vacibdi.

 

- “Bankirlər”in baş məşqçisi Kaxaber Tsxadadze oyununuzu izləyirdi...

- Hə. O, bizim hər oyunumuza gəlir. Normal bir şeydi.

 

- Razısız ki, “Xəzər Lənkəran” indiki ilə müqayisədə daha da güclü ola bilərdi?
- Düzdü, iki il əvvəllə müqayisədə fərqlərin olduğunu görmək mümkündü. Amma mən komanda yoldaşlarıma inanıram. Biz ilk altılığa düşəcəyik və yüksək yerlər uğrunda mübarizə aparmağa davam edəcəyik.

 

- Amma hələ də buna nail ola bilməmisiz...

- Çox adi oyunlarda axmaq qollar buraxdıq, uduzduq. Buna görə də əsas rəqiblərimizdən bir qədər geri qalırıq. Klub yeni transferlər həyata keçirir. Ümid edirik ki, onların bizə faydası çox olacaq. Əgər qarşıdakı hər bir oyunumuzdan maksimum nəticə ilə ayrıla bilsək, turnir cədvəlində irəliləyə bilərik. Altıncı yer “Xəzər Lənkəran” üçün deyil. “Neftçi”, “Turan” və “Qarabağ”la oyunlarımız bizim üçün həlledici oldu. Halbuki, minimum 6-7 xal toplamaq olardı.