Kamerunlu futbolçu da Kəpəzdən getdi

“Kəpəz”in kamerunlu futbolçusu Armand Feutçin Gəncə klubuyla yollarını ayırıb. Azerisport.az xəbər verir ki, yarımmüdafiəçi artıq özünə yeni klub da tapıb.

 

Belə ki, o, bundan sonra Yunanıstanın birinci divizion klubu “Kalitea”da çıxış edəcək. 36 yaşlı futbolçu yeni klubu ilə müqavilə də imzalayıb.

Qeyd edək ki, vaxtilə Yunanıstanın digər klublarında da çıxış etmiş təcrübəli futbolçu “Kəpəz”də iki mövsüm idi top qovurdu. Qışda klub rəhbərliyi əksər legionerlərlə yolları ayırsa da, Feutçinin komandada qalacağını açıqlamışdı. Amma görünür komandadakı maliyyə çətinlikləri kamerunlu oyunçunu da “Kəpəz”dən ayrılmağa məcbur edib.