2 fevral 2013 18:10
Rail meydandan qovuldu, komandası Cavidin klubuna məğlub oldu (YENİLƏNİB)
Bu gün futbol üzrə Türkiyənin PTT Birinci Liqasında 20-ci turun oyunları keçirilib. Azerisport.az xəbər verir ki, sözügedən çempionatda çıxış edən azərbaycanlı futbolçuların komandaları – “Adana Demirspor”la “Denizlispor” bu tur bir-biri ilə üz-üzə gəlib.
Qeyd edək ki, “Adana Dəmirspor”da Cavid Hüseynov, “Denizlispor”da isə Rail Məlikovla Arif İsayev çıxış edir. Lakin onların ifasında bu dəfə Türkiyədə Azərbaycan derbisini izləmək mümkün olmadı. Məsələ burasındadı ki, Cavid hazırda Dubayda təlim-məşq toplanışında olan yığmamızın düşərgəsindədi. Arif İsayev isə zədəli olduğuna görə komandasına kömək edə bilməyib. Ona görə də bu görüşdə yalnız Rail Məlikovun iştirakı mümkün olub.
Lakin Railin komandası bu görüşdən məğlub ayrılıb. Daha iki komanda yoldaşının meydandan qovulduğu görüşdə Məlikov da xoşagəlməz aqibətlə üzləşib. Belə ki, o, 85-ci dəqiqədə birbaşa qırmızı vərəqə almaqla komandasını daha da pis vəziyyətdə qoyub.
“Adana Demirspor” 20 oyundan sonra 33 xalla dördüncü, “Denizlispor” isə 24 xalla 12-ci pillədə qərarlaşıb.
Türkiyə PTT Birinci Liqası
20-ci tur
2 fevral
2 fevral
Adana Demirspor - Denizlispor - 2:1
