4 fevral 2013 18:42
“Cavid İmamverdiyev bizim istədiyimiz qədər effektli deyildi”
Futbol üzrə Azərbaycanın U-21 yığmasının baş məşqçisi Bernard Lippert əsas yığmamızın Dubaydakı düşərgəsinə təşrif buyurub. Azerisport.az xəbər verir ki, o, burda keçmiş yetirmələrinin məşqlərini, oyunlarını izləməkdədi.
Bu gün baş tutan məşqdən sonra isə o, bəzi məsələlərlə bağlı fikirlərini açıqlayıb: “Dubaya bütövlükə yığma komandaya baxmağa, eləcə də ötən tsikldə U-21-də çıxış etmiş oyunçuları izləməyə gəlmişəm. Onların indiki durumuna baxmaq istəyirəm. Mən bəlkə də indi Azərbaycanın ən gənc yığmasının hazırlığını izləyirəm”.
Lippert öz komandasının yenicə başa çatan Türkiyə toplanışından da danışıb: “Maraqlı toplanış oldu. Hazırlıqlar zamanı mən təxminən 10 yeni futbolçunu baxışdan keçirdim. Düzünü deyim ki, onların heç də hamısı xoşuma gəlmədi. “İnter”dən Fuad Bayramovu bəyəndim. Eləcə də, Türkiyə klublarından gəlmiş iki futbolçu xoşuma gəldi. Onların perspektivli oyunçu olduqlarını düşünürəm”.
Lippert U-21-in zəif cəhətlərindən də danışıb: “Bizim hazırda qapıçı problemimiz var. Təəssüf ki, yerli qapıçılar öz klublarında çox az forma şansı qazanırlar. Heç qapıçılarla işləyən məşqçilər də yoxdu. Heç kim öyrənmək istəmir. Ona görə də mən qapıçılar üçün xüsusi toplanış keçirməyə qərar vermişəm. Əsas yığmanın çalışdırıcısı Uli Ştayn da bu işdə bizə kömək edəcək”.
Almaniyalı mütəxəssis hücum xəttindən də narazıdı: “Bizdə normal hücumçu yoxdu. Bu problem ötən tsikldə də mövcud idi. Cavid İmamverdiyevi təsadüfən hücumda oynatmırdıq. Amma o da biz istədiyimiz kimi effektli deyildi. Bu mövsüm belə problemlərdən qaçmaq lazımdı”.
