6 fevral 2013 00:04
Yeni ildə ilk rəsmi sınaq
Məlum olduğu kimi, futbol üzrə Azərbaycanın əsas yığma komandası yanvarın 29-dan etibarən Birləşmiş Ərəb Əmirliklərin Dubay şəhərində təlim-məşq toplanışındadı. Azerisport.az xəbər verir ki, komandamız hazırlıq prosesi çərçivəsində bu gün ikinci və sonuncu yoxlama matçına çıxacaq.
Berti Foqtsun rəhbərlik etdiyi yığmamızın bu dəfəki rəqibi isə Lixtenşteyn seçməsidi. Qeyd edək ki, Özbəkistan yığması FİFA-nın son açıqlanan reytinq cədvəlində146-cı yeri tutur. Cırtdan ölkə təmsilçisi zəif rəqib təsiri bağışlasa da, yığmamız bu komandaya heç də yuxarıdan aşağı baxmamalıdı. Düzdü, reytinq cədvəlindəki yerinə görə millimiz (maraq üçün bildirək ki, millimiz hazırda 118-ci pillədə qərarlaşıb) bu rəqibindən xeyli öndədi. Amma bu, lixtenşteynliləri asanlıqla yenəyəcəyimiz anlamına gəlməməlidi.
Millimizin rəqibinə Rene Pauriç başçılıq edir. Avstriyalı mütəxəssis 2012-ci ildən etibarən bu yığmanı çalışdırır. Rəqibimizin heyətində Türkiyə, İsveçrə, Almaniya, Avstriya və Tailand çempionatlarında çıxış edən legioner futbolçular var.
Azərbaycan yığmasına gəlincə, komandamız 2013-cü ildə ilk dəfədi bir araya gəlib. Dubay toplanışı çərçivəsindəki ilk oyununda Özbəkistanla qarşılaşan təmsilçimiz qolsuz heç-heçəyə razılaşmışdı. Bu üzdən də millimiz ilk qələbəsini Lixtenşteynlə görüşdə qazanmağa çalışmalıdı. Komandamız mart ayında DÇ-2014-ün seçmə mərhələsi çərçivəsində Lüksemburq və Portuqaliya yığması ilə qarşılaşacaq. Bu görüş isə həmin rəsmi oyunlar öncəsi son sınaqdı. Bu üzdən də qazanılacaq qələbə komandadakı özünəinamı artıra bilər.
Həm də özbəklərlə qeyri-rəsmi ilk yoxlama matçından fərqli, Lixtenşteynlə oyun FİFA-nın yoldaşlıq oyunları üçün ayırdığı “pəncərə”yə düşür. Bu isə o deməkdi ki, qeydə alınacaq nəticə reytinq mövqeyimizə təsir edəcək. Odu ki, reytinq mövqeyinə görə çox tənqid olunan Berti Foqtslu yığmamız bu şansdan maksimum yararlanmağa çalışmalıdı. Bu yolda yeganə əngəl kimi Berti Foqtsun bəzi aparıcı futbolçularımızı Dubaya aparmaması qeyd olunmalıdı.
Maraq üçün bildirək ki, Lixtenşteyn yığması Azərbaycan üçün tanış rəqibdi. Belə ki, bu komandalar indiyə qədər dörd dəfə üz-üzə gəliblər. Özü də bütün duellər seçmə mərhələ oyunları çərçivəsində baş tutub. Yığmamızın iki dəfə qələbə qazandığı bu görüşlərdən biri sülhlə bitib. Qalan bir oyunda isə Lixtenşteyn qələbəni bayran edən tərəf olub. Vurulan topların fərqində də yığmamız öndədi – 7:2.
Tərəflər arasındakı ilk oyun 2000-ci il Avropa çempionatının seçmə mərhələsi çərçivəsində 1998-ci ilin 14 oktyabr tarixində Vadutsda baş tutub. Həmin görüş Lixtenşteynin 2:1 hesablı qələbəsi ilə başa çatıb. 1999-cu il, iyunun 5-də Bakıda keçirilən qarşılaşmada isə Azərbaycan millisi 4:0 hesablı darmadağına sevinib. Bu komandalar bir də 2010-cu il dünya çempionatının seçmə mərhələsində üzləşiblər. 2008-ci ildə, sentyabrın 10-da Bakıda baş tutan dueldə qolsuz heç-heçə qeydə alınmışdı. 2009-cu ilin 10 oktyabrında Vadutsda keçirilən görüşdə isə yığmamız 2 cavabsız qolla qalib gəlmişdi.
Bütövlükdə isə, yığmamız bu gün tarixi ərzində 193-cü matçına çıxacaq. İndiyəqədərki oyunların 32-də qələbə qazanmışıqsa, 49-da da heç-heçə ilə təsəlli tapmışıq. 111 qarşılaşmada isə məğlubiyyətlə üzləşmişik. Topların fərqi də millimizin xeyrinə deyil: 132 qol vurduğumuz halda, öz qapımızdan 340 top çıxarmışıq.
Yoldaşlıq oyunu
6 fevral
AZƏRBAYCAN – LİXTENŞTEYN
Baş hakim: Abdulla Əl Ajel, Həsən Sukatri, Yasim Abdull, Hamed Əl Şaik (Birləşmiş Ərəb Əmirlikləri).
Dubay. “The Sevents” stadionu.
