7 fevral 2013 00:59
Ramin Musayev: Klubların transfer siyasətindən narazıyam
Peşəkar Futbol Liqasının prezidenti Ramin Musayev klublarımızın qış fasiləsi dönəmindəki fəaliyyətini dəyərləndirib. Azerisport.az saytına müsahibəsində o, bir sıra məsələlərə aydınlıq gətirib.
Qeyd edək ki, klublarımız Türkiyədə bütövlükdə 40 oyun keçirdilər ki, onların yalnız 13-də qələbə qazana bildilər. 14 dəfə heç-heçə edən təmsilçilərimiz qalan matçlarda da meydanı məğlub tərk etdilər.
Lakin Ramin Musayev bu oyunlarda nəticənin o qədər də böyük önəm kəsb etmədiyini deyir: “Bunlar sadəcə adi yoxlama görüşləri idi. Onlardan bəzilərini mən də izləmişəm. Nəticə önəm daşımırdı. Fikrimcə, belə sınaq matçları məşqçilərə yalnız bir şey üçün lazımdı: komandalarını daha da yaxşı hazırlaşdırmaq üçün”.
Musayev bəzi narazılıqlarını da dilə gətirib: “Mən bu qış daha yaxşı transferlər gözləyirdim. Amma etiraf edim ki, bunu görmədim. Hesab edirəm ki, səs-küylü transferlər komandalara öz istəklərinə nail olmaqda böyük kömək edir. Amma bu il elə transferlər görmədik. Düzdü, ola bilər ki, yeni gələn futbolçular çox uğurlu çıxışla özlərindən söz etdirsinlər. Bizə yalnız gözləmək qalır”.
PFL prezidenti hesab edir ki, mövsümün bundan sonrakı çox gərgin keçəcək: “Mənə elə gəlir ki, bizi çox maraqlı oyunlar gözləyir. Təbii ki, əsas mübarizə ilk altılıqda gedəcək. Mütəxəssislər də komandaların Türkiyə toplanışına məhz həmin vaxt qiymət verə bilərlər”.
Ramin Musayev yığmamızın Dubay toplanışından da danışıb: “Etiraf edim ki, Dubay toplanışında gördüklərim məni sevindirdi. Xüsusilə də komandada gənclərin sayının artmasını qeyd etmək istərdim. Xüsusi olaraq kimisə qeyd etmək istəmirəm”.
