8 fevral 2013 00:44
Rəvan baxışda olanlarla bağlı yaxın günlərdə qərar verəcək
İlk "altılıq” şansları qalsa da, daha çox növbəti mövsümün kollektivini qurmaq istəyən “Rəvan”ın düşərgəsində 2 futbolçu baxışdan keçir. Azerisport.az xəbər verir ki, bunlardan biri yaponiyalı müdafiəçi Naoya Şibamuradı. Özbəkistan "Buxara”sından gələn asiyalı arxa xətt oyunçusu hələ ki özü barəfə müsbət fikir formalaşdıra bilib.
Düşərgədə baxışdan keçirilən digər futbolçu isə Litva millisinin üzvüdü. Fevralın 28-də 29 yaşını qeyd edəcək Mindauqas Kalonas "Jalgiris”in yetirməsidi. Gənc yaşlarında Moskva "Dinamo”su, "Saturn” və "Rubin”in əvəzedicilərdən ibarət komandalarında çıxış etmiş litvalı yarımmüdafiəçi özünü Latviyanın "Metallurq” klubunda ən yaxşı tərəfdən göstərib. Belə ki, Liepaya təmsilçisinin heyətində çempionatda keçirdiyi 55 oyuna 15 qol vurmağı bacarıb. Üstəlik, 2005-ci ildə Latviya çempionu, 2006-cı ildə isə Latviya kubokunun qalibi olub. Onun dövründə "Metallurq” çempionatda 2-ci olub.
Uğursuz "Kuban” macərasından sonra xavbek Latviyanın "Riqa”, İrlandiyanın "Bohemians” komandalarında da top qovub. Sonuncuların heyətində 2008-ci ildə həm ölkə çempionu olub, həm də kuboku qazanıb. Kalonas İrlandiya kubokunun finalında oynamış ilk litvalı kimi də tarixə düşüb. 2009-12-ci illər ərzində Ukrayna premyer liqasında çıxış edən Zaporojye "Metallurq”unun şərəfini qorumuş futbolçunun son "dayanacağı” Polşanın I divizion təmsilçisi "OKS Stomil” olub.
Mindauqas Litva millisinin heyətində 35 matçda forma geyib və 2 dəfə fərqlənib. Maraqlıdır ki, o, qollarının hər ikisini DÇ-2010-un seçmə turnirində vurub. 177 sm boya, 72 kq çəkiyə malik Kalonas Rumıniya və Serbiya komandalarını məyus edib.
Qeyd edək ki, həm Şibamura, həm də Kalonas ilə bağlı yekun qərar yaxın 2-3 günə veriləcək.
