9 fevral 2013 00:42
Mahmud Qurbanov: Zəif nəticələrimizi unutdurmaq istəyirik
“Kəpəz"in baş məşqçisi Mahmud Qurbanov klubun rəsmi saytına verdiyi müsahibədə komandanın hazırlıq prosesi, heyətə cəlb edilən yeni transferlər, eləcə də digər önəmli məsələlər haqda danışıb. Azerisport.az həmin müsahibə ilə sizi də tanış edir.
- Təlim-məşq toplanışını necə qiymətləndirirsiz?
- Tam hazır olduğumuzu deyə bilmərəm. Çünki məşqlərə gec başladıq. Heyətimizdə yeni futbolçular var. Onlar komandaya gec qoşulduqlarından, hələ tam uyğunlaşa bilməyiblər. İlk günlərdən bir yerdə olmamışıq. Son 3-4 gündə düşərgəyə gələnlər də var və bunu nəzərə almaq lazımdı.
- Komandaya götürdüyünüz yeni legionerlər haqda nə deyə bilərsiniz?
- Heyət cəlb etdiyimiz legionerlər bizə kömək edə biləcəklər. Buna görə əcnəbiləri komandaya götürmüşük. Baxmamış, oyununa qiymət verməmiş hec kimlə müqavilə bağlamamışıq. Komandamızın büdcəsinə uyğun futbolçular götürmüşük. Onların "Kəpəz"ə necə kömək edə biləcəklərini çempionat oyunlarında görə biləcəyik.
- Yerlilər haqda nə fikirləşirsiniz?
- Heyətə cəlb etdiyimiz uşaqlar arasında gənclərlə yanaşı təcrübəlilər də oldu. Cəmşid Məhərrəmov, Fərid Quliyev belələrindəndir. Quliyevin məsələsi hələ tam həllini tapmayıb. Amma ümid edirəm ki, Fərid bizimlə olacaq. Onların meydanda olmaları işimizə yarayacaq. Həmçinin adını çəkmədiyim digərlərindən də uğurlu çıxış gözləyirik. Gənclərə gəlincə, onlara ümidimiz böyükdür.
- Çempionatın qarışıdakı hissəsi barədə də düşüncələrinizi bilmək maraqlı olardı...
- Ötənilkindən yaxşı çıxış etməliyik. Zəif nəticələrimizi unutdurmaq istəyirik. Bacardıqca daha çox xal qazanıb, yuxarı pillələrə qalxmaq əsas məqsəddir. Düzdü, rəqiblərlə aramızda xal fərqimiz çoxdu.
- Fasilədən sonrakı ilk turda rəqib Neftçidi...
- Çətin oyun olacağını düşünürəm. Rəqib güclüdür. Çempionluğa oynayan komandadı. Heyətlərində yaxşı futbolçular cəmləşib. Amma bu o demək deyil ki, biz asan təslim olacağıq. Oynayıb, xal qazanmağa çalışaçağıq. Bunun nə dərəcədə alınacağını oyun göstərəcək.
