9 fevral 2013 15:02
Yığmamız yarımfinalda uduzdu
Çimərlik futbolu üzrə Azərbaycan milli komandası Rusiyanın Sankt-Peterburq şəhərində təşkil olunmuş “Open Beach Soccer League 2013” turnirində növbəti oyununu keçirib. Azerisport.az xəbər verir ki, yığmamızın bu dəfəki rəqibi Rusiyanın “Kristall” klubu olub.
Yarımfinal mərhələsi çərçivəsində keçirilən oyun millimizin 3:4 hesablı məğlubiyyəti ilə yekunlaşıb. Millimizin üzvü Comərd Baxşəliyev matçın 18-ci dəqiqəsində penaltidən yararlana bilməyib.
Bütövlükdə isə, komandamız bu görüşdə aşağıdakı heyətlə mübarizə aparıb: Əbdül Əliyev, Ramil Əliyev, Hikmət Bağırov, Comərd Baxşəliyev, Elçin Qasımov, Elvin Quliyev, Fayər Hüseynov, Asif Zeynalov, Zeynal Zeynalov, Orxan Məmmədov, Nahid Mehrəliyev, Vaqif Şirinbəyov.
Qeyd edək ki, Bəhram Hətəmovun yetirmələri qrup mərhələsindəki ilk oyunda Rusiyanın “Podvodnik” klubuna 5:1 hesabıyla qalib gəlmişdi. İkinci oyunda “Golden”ə uduzan futbolçularımız ELMONT-u 5:3 üstələmişdilər.
İndi Azərbaycan millisini üçüncü yer uğrunda oyun gözləyir. Yığmamız üçüncü yer uğrunda oyunda yenə “Golden”lə üz-üzə gələcək.
