12 fevral 2013 14:58
Tahir Süleymanov: Foqts klubların uğur qazanmasını istəmir
“Neftçi”nin vitse-prezidenti Tahir Süleymanov futbol üzrə Azərbaycan yığmasının martın 13-dən 26-dək təşkil olunacaq təlim-məşq toplanışı ilə bağlı fikirlərini açıqlayıb. Azerisport.az saytına müsahibəsində o, bunları dilə gətirib:
“Azərbaycan klubları avrokuboklarda yaxşı çıxış etmək istəyirlər. Amma çempionatımızda sabitlik olmasa, avrokuboklarda uğur qazanmaq çətindi. “Neftçi” artıq Avropa Liqasının qrup mərhələsinə vəsiqə qazanıb. İndi bunu yenidən təkrarlamaq istəyirik. Amma yığmanın toplanışları normal çempionat keçirməyə imkan vermir. Mənim Berti Foqtsa bir sualım var: Bu toplanış Lüksemburqu məğlub etməyə kömək edəcək, yoxsa dünya çempionatına vəsiqə qazanmaq üçün çalışır? Realist olmaq lazımdı. Bir oyuna görə çempionatın təqvimini pozmaq olmaz. Foqts klublarımızın uğur qazanmasını istəmir. Çünki klublar uğurlu çıxış edəndə, ondan da nəticə tələb olunmağa başlayır”.
