14 fevral 2013 11:55
“Rəqabət mənə tanışdı və ondan qorxmuram”
Futbol üzrə Azərbaycan yığmasının və “Bakı”nın forvardı Rauf Əliyev Topaz Premyer Liqasının 16-cı turundan təxirə salınmış “Turan”la oyundan (4:0) sonra fikirlərini açıqlayıb. Azerisport.az saytına müsahibəsində o, bunları dilə gətirib:
“Bu dəfə nəhayət ki, istədiyimizi edə bildik və qələbə qazandıq. Təəssüf ki, fasilədən sonrakı ilk oyunumuzda bu fürsəti əldən vermişdik. Amma ilk oyunlar həmişə çətin olur”.
“Bu dəfə nəhayət ki, istədiyimizi edə bildik və qələbə qazandıq. Təəssüf ki, fasilədən sonrakı ilk oyunumuzda bu fürsəti əldən vermişdik. Amma ilk oyunlar həmişə çətin olur”.
Əliyev bundan öncəki “Sumqayıt”la görüşdə ilk dəqiqələrdən meydanda olsa da, bu dəfə Bojidar Bandoviç onu ikinci hissədə döyüşə atdı. Bəs görəsən, belə dəyişikliyə səbəb nədi: “Sumqayıt”la oyundan sonra baş məşqçi ilə söhbətləşdik və belə qərara gəldik ki, mən oyuna ehtiyatda başlasam, daha yaxşıdı. Axı ötən həftə üç oyuna çıxmışdım. Ona görə də “Turan”la oyunda start heyətdə deyildim”.
Rauf Əliyev komandasının ilk altılığa düşmək şansları barədə də danışıb: “Şansımız hələ də var. Qarşıda bizi də, rəqiblərimizi də çətin oyunlar gözləyir. Ona görə də hələ heç nə tam dəqiqləşməyib. Bütün oyunlar çətin olacaq. Lakin biz istəyimizə nail olmağa çalışacağıq”.
“Zolaqlılar”ın yeni forvardı qarşıdakı AZAL ilə oyuna da toxunub: “Güclü rəqibdi. Əminəm ki, onlar da bizimlə oyunda qələbə qazanmağa çalışacaqlar. Onların heyətində 4-5 futbolçunu xüsusi vurğulamaq olar ki, həmin oyunçular istənilən matçın taleyini həll etməyə qadirdilər. Amma biz öz üç xalımızı qazanmaq istəyirik”.
Əliyev uzun müddət “Qarabağ”da demək olar ki, əvəzolunmaz hücumçu sayılırdı. Lakin onu paytaxt klubunda Marius Pena, Ferdi Elmas kimi hücumçularla rəqabət gözləyir. Görək, millinin üzvü bu məsələyə necə münasibət bəsləyir: “Mən deməzdim ki, indiki vəziyyət “Qarabağ”dakından fərqlənir. Ağdamlıların da heyətində Vaqif Cavadov, Vüqar Nadirov kimi hücumçular var idi. Hərdən Əfran İsmayılov da hücumda oynayırdı. Ona görə də rəqabət mənim üçün tanış şeydi və ondan qorxmuram”.
