14 fevral 2013 14:08
Yığmamız FİFA reytinqində yenə yerində saydı
FİFA dünyanın futbol yığmalarının növbəti reytinq siyahısını açıqlayıb. Azerisport.az xəbər verir ki, Azərbaycan yığması yeni açıqlanan siyahıda yerində sayıb.
Belə ki, 2013-cü il üçün ilk reytinq cədvəlində olduğu kimi, Azərbaycan milli komandasının mövqeyində bu dəfə də dəyişiklik olmayıb. Millimiz sadəcə xal ehtiyatını bir qədər yaxşılaşdırıb. Berti Foqtsun çalışdırdığı komandamız hazırda 283 xalla (ötən ay yığmamız 277 xala malik idi) 118-ci yerdə qərarlaşıb.
DÇ-2014-ün seçmə mərhələsində yığmamızın rəqiblərindən olan komandalar arasında yalnız Lüksemburqu qabaqlayırıq. Bu komanda 174 xalla 148-ci yerdədi. Şimali İrlandiya 4 pillə geriləyib. İrlandlar hazırda 354 xalla 102-cidilər. Portuqaliya bir pillə irəliləyib və hazırda 1129 xalla altıncıdı. Bir pillə geriləyən Rusiya 1055 xalla 10-cu pillədədi. İsrail isə on pillə irəliləyib. Bu ölkənin millisi 495 xalla 66-cı yerdə gedir.
Reytinq siyahısının ilk onluğunda isə vəziyyət belədi: 1. İspaniya (1590 xal), 2. Almaniya (1437), 3. Argentina (1281), 4. İngiltərə (1160), 5. İtaliya (1157), 6. Kolumbiya (1129), 7. Portuqaliya (1129), 8. Hollandiya (1108), 9. Xorvatiya (1059), 10. Rusiya (1055).
Qeyd edək ki, növbəti reytinq cədvəli martın 14-də açıqlanacaq.
