20 fevral 2013 15:21
Vüqar Nadirov: Qarabağın hücumçu problemi yoxdu
“Qarabağ” “Rəvan”la oyunun hazırlıqlarını davam etdirir. Azerisport.az xəbər verir ki, Premyer Liqanın 21-ci turunda Bakı klubunun qonağı olacaq komanda artıq hazırlıqlarını bitirmək üzrədi.
Vacib oyun öncəsi “Qarabağ”ın sağ cinah vingeri Vüqar Nadirova tribuna verilib. 25 yaşlı futbolçu öncə “Rəvan”ı dəyərləndirib:
“Rəvan” qışdan sonra keçirdiyi hər 2 oyunda qalib gəlib. İstənilən komandaya baş ağrısı yaratmağa qadirdilər. Elə ilk dövrədə baş tutan oyunda da qalib gələ bilməmişdik. Rəqibin cüzi də olsa altılıq şansları qalır. Ona görə də var güclərini meydana qoyacaqlar. Bilirik ki, bizi çətin oyun gözləyir. Amma təbii ki, meydana 3 xal üçün çıxacağıq”.
Nadirov “Qarabağ”dakı rəqabətdən və hədəflərdən də danışıb: “Qışda bir neçə transfer etmişik. Bu istər-istəməz həm komandanı gücləndirib, həm də rəqabəti artırıb. Komandamızın hücumçu probleminin olduğunu düşünmürəm. Hazırda Vaqif ön xəttin sivri ucunda çıxış edir. Cavadov heç də pis təsir bağışlamır. Hələ Subaşiç də var. Ümumiyyətlə, kim oynayırsa oynasın, bizim üçün fərq yoxdu. Hamı çıxıb komandaya fayda verməyə çalışır. Bəli, komandada oynamaq üçün rəqabət var. Amma bizdəki qardaşı rəqabətidi. Meydanda olan da, olmayan da “Qarabağ”a fayda vermək üçün çalışır. Cari mövsüm qarşımıza çempionluq hədəfi qoyulub. Amma bizim hədəfimiz hər matça çempionluq görüşü kimi çıxıb qalib gəlməkdi. “Rəvan”a da məhz istək və arzuyla yanaşırıq”.
