21 fevral 2013 14:09
Xəzər Lənkəran üçün 10-cu səfər
“Xəzər Lənkəran” Topaz Premyer Liqasının 21-ci turunda “Qəbələ”nin qonağı olacaq. Azerisport.az xəbər verir ki, bu matç komandanın tarixində qəbələlilərlə yubiley – 20-ci qarşılaşma olacaq.
Cənublu futbolçular indiyədək 17 çempionat və 2 kubok matçında bu rəqiblə üz-üzə gəlib. “Ağ-yaşıllar” tarixində 10-cu dəfə “Qəbələ”nin qonağı olacaq. Səfərdə 5 qələbəsi olan komanda 2 heç-heçə edib və 2 dəfə uduzub. Rəqib meydanında 13 qola imza atan “ağ-yaşıllar” 8-ni buraxıb.
İndiyəqədərki matçların balansında aşkar üstünlüyə malik “ağ-yaşıllar” 11 dəfə qalib gəlib, 5 dəfə bərabərliklə kifayətlənib və 3 dəfə məğlub olublar. Top fərqində də “Xəzər Lənkəran”ın üstünlüyü aşkar görünür – 31:15.
Bu məhsuldarlığın nəticəsidir ki, “Xəzər Lənkəran” tarixi ərzində yalnız 1 dəfə “Qəbələ”nin qapısına yol tapmayıb. Həmin oyundan sonra isə ardıcıl 5 qarşılaşmadır XL meydanı qolsuz tərk etmir.
“Xəzər Lənkəran”ın “Qəbələ” ilə matçlarda vurduğu 31 qola isə 17 futbolçu imza atıb. Kubok oyununda avtoqol müəllifi kimi tarixə düşən “Qəbələ”li İrakli Vaşakidze istisna olmaqla “Xəzər Lənkəran”ın 16 üzvü rəqib qapısına yol tapıb. Zaur Ramazanov hamıdan çox – 6, indi “Qəbələ”də çıxış edən Rəşad Abdullayev 4, Rahid Əmirquliyevlə Allan Lalin hərəyə 3, Emeka Opara və Emin Quliyev hərəyə 2 dəfə bu rəqibin qapısına yol tapıblar.
