21 fevral 2013 14:58
Yığmamız dünyanın ulduz futbolçuları ilə yoldaşlıq oyunu keçirmək istəyir
Dünyanın tanınmış veteran futbolçuları Azərbaycana gələcəklər. Azerisport.az saytına müsahibəsində bunu Azərbaycan Futbol Veteranları İttifaqının rəhbəri Oqtay Abdullayev xəbər verib.
O bildirib ki, Almaniya, Hollandiya, Türkiyə, Rusiya, Ukrayna və Gürcüstandan olan veteranlar Azərbaycanın mərhum prezidenti Heydər Əliyevin 90 illik yubileyi münasibətilə ölkəmizə təşrif buyuracaqlar. Onlar ölkəmizin futbol veteranlarından ibarət komanda ilə yoldaşlıq görüşündə üz-üzə gələcəklər.
“Mayda veteranların növbəti matçını təşkil etməyi düşünürük. Rusiya yığmasını dəvət etmək istəyirdik. Amma onlar son dövrlər səfər oyunlarına getmirlər. Ona görə də biz bu dəfə Avropanın keçmiş futbol ulduzlarını dəvət etməyi qərara aldıq. Daha çox SSRİ yığmasının keçmiş futbolçuları ilə əlaqə saxlayırıq. Bunların arasında Georgi Yartsev, Rinat Dasayev, Vaqiz Xidiyatullin, eləcə də Gürcüstan, Ukrayna, Türkiyə, Almaniya və Hollandiyadan olan futbolçular da var. Almaniyadan Berti Foqtsu dəvət edəcəyik. O, özü ilə daha iki futbolçu gətirə bilər. Türkiyədən isə Bülent Korkmaza dəvət göndərmişik. Hollandiyadan olan veteranlarla danışıqlarımız davam edir. Yaxşı şou təşkil etmək istəyirik”.
Qeyd edək ki, oyunun mayın ilk həftəsində Tofiq Bəhramov adına Respublika stadionunda təşkili gözlənilir.
