25 fevral 2013 15:54
Emeka Opara Qarabağda!
“Xəzər Lənkəran”ın sabiq hücumçusu Emeka Opara yenidən Azərbaycana qayıdıb. Azerisport.az xəbər verir ki, nigeriyalı forvard bundan sonra “Qarabağ”da çıxış edəcək.
Artıq Ağdam klubu onunla ilyarımlıq müqavilə imzalayıb. Məlumatı klubun mətbuat xidmətindən də təsdiqləyiblər.
Qeyd edək ki, Opara 1984-cü ildə anadan olub. O, peşəkar karyerasında 2001-2003-cü illər aralığında çıxış etdiyi “Enugu Rangers” klubunda başlayıb. 2004-2006-cı illərdə isə Opara Tunisin “Etoile Sportive du Sahel” klubuna keçib və burada 40 oyuna 21 qol vurub. 2007-2008-ci illərdə o, Almaniyanın “Kaiserslautern” klubuna transfer olunub və 23 oyunda 13 qola sevinib. 2008-2009 mövsümündə yenidən “Etoile Sportive du Sahel”ə qayıdan Opara burda daha 21 oyun keçirib, 11 dəfə rəqib qapılarına yol tapıb. 2009-cu ildə isə Emeka “Xəzər Lənkəran”a transfer olunub. O, 2011-ci ilə qədər çıxış etdiyi cənub klubunda 48 qarşılaşmada 32 qola sevinib. 2012-ci ildə “Al Naser”də (Küveyt) top qovan ağdamlıların yeni transferi burda da 19 oyunda 11 qol vurub.
