26 fevral 2013 18:45
Neftçi Xocalı faciəsinin qurbanlarını andı
Xocalı soyqırımı Azərbaycan tarixinin ən faciəli səhifələrdən biridir. XX əsrin faciəsi olan Xocalı soyqırımı ermənilərin vəhşi siyasətinin nəticəsidir. Bu faciə təkcə Azərbaycan xalqına deyil, bütün insanlığa, bəşəriyyətə qarşı yönəlmiş ən ağır cinayətlərdən biridir. Xocalı soyqırımı əsrin Xatın, Xirosima, Naqasaki və Sonqmi kimi dəhşətli faciələri ilə bir sırada dayanır. 1992-ci il fevralın 26-da Xocalı şəhərində genosid aktı həyata keçirdi. Xocalı soyqırımı zamanı 613 nəfər qətlə yetirildi, 1000 nəfər müxtəlif yaşlı dinc sakin aldığı güllə yarasından əlil oldu. 106 nəfər qadın, 63 azyaşlı uşaq, 70 qoca öldürüldü. 8 ailə tamamilə məhv edildi, 25 uşaq hər iki valideynini, 130 nəfər valideyinlərindən birini itirdi. Faciə baş verən gecə 1275 nəfər dinc sakin girov götürüldü, onların 150-sinin taleyi indi də məlum deyil. Bütün bunlar erməni hərbçiləri tərəfindən xüsusi amansızlıqla və ağlasığmaz vəhşiliklə həyata keçirilmişdir. İnanırıq ki, beynəlxalq ictimaiyyət bu dəhşətli faciəyə hüquqi qiymətini verəcək və cinayətkarlar layiqli cəzalarına çatacaqlar. Azərbaycan xalqı Xocalıda törədilən bu vəhşiliyi heç vaxt unutmayacaq və orada şəhid olmuş soydaşlarımızı daim yad edəcək.
Bu gün “Neftçi”nin futbolçuları Xocalı faciəsi qurbanlarının xatirəsini 1 dəqiqəlik sükutla yad edib. “Simurq” ilə keçiriləcək oyun üçün səhər saatlarında Zaqatalaya yollanmış komanda üzvlərini aparan avtobus yolda dayanıb. Ölkə ərazisində müəyyən olunmuş vaxtda saat 17:00-da Xocalı faciəsinin qurbanlarının xatirəsi 1 dəqiqəlik sükutla anılıb.
Allah rəhmət eləsin!
