26 fevral 2013 13:55
Marius Pena: Hamıdan üzr istəyirəm
“Bakı”nın rumın hücumçusu Pena Marius ilk günlərdən diqqət mərkəzindədi. Azerisport.az xəbər verir ki, inamlı və məhsuldar oyunu ilə seçilən forvard "Bakı"nın rəsmi internet saytına müsahibə verib.
- Artıq bir aydır ki, Azərbaycandasan. Ölkə çempionatında 4 oyun keçirmisən, az da olsa, təcrübə toplamısan. Ümumiyətlə Premuer Liqa barədə hansı fikirdəsən?
- Çempionat çox gərgin keçir. Son tura qədər ən azı 3 komanda ilk altığa düşmək üçün mübarizə aparır. Bu amil çempionatın gərgin və maraqlı keçməsindən xəbər verir. "Bakı"nın heyətində 4 oyun keçirmişəm. İki dəfə fərqlənmişəm və bu mənim üçün yaxşı haldı. Təəssüflər olsun ki, sonuncu oyunda penaltidən yararlana bilmədim və buna görə komanda yoldaşlarım, baş məşqçi, rəhbərlik və azarkeşlərimizdən üzr istəyirəm. Həmin oyunda qalib gəlsəydik, indi vəziyyətimiz tam başqa olardı. Ancaq bu, futboldu, kiminsə belə hadisələrdən sığortası yoxdu. Çalışacağam ki, növbəti oyunlarda vurduğum qollarla onları sevindirim.
- Növbəti oyun kubok turnirinə təsadüf edir. “İnter”lə derbi barədə nə deyə bilərsən?
- “İnter” klubu barədə çox məlumatlı olmasam da, təkcə onu qeyd etmək kifayət edər ki, onlar çempionatın liderlərindən biridi. Bu da ondan xəbər verir ki, rəqib güclü və ciddi klubdu. Buna baxmayaraq, mən inanıram ki, biz bu oynda qələbə qazanaraq ikinci oyun öncəsi yaxşı nəticə əldə edəcəyik. Əminəm ki, növbəti tura biz keçəcəyik.
Qeyd edək ki, “Bakı” növbəti oyununu 27 fevral 2013-cü il tarixdə öz meydanında "İnter"ə qarşı keçirəcək. Azərbaycan Kuboku uğrunda yarışların 1/4 final mərhələsinə təsadüf edən qarşılaşma saat 15:00-da başlanacaq.
