28 fevral 2013 01:00
“Biz gənclər təcrübə sarıdan əziyyət çəkirik”
“Kəpəz” AZAL-la oyunda uduzsa da, heyətdə yer alan futbolçulardan Ramil Kərimov özünü yaxşı tərəfdən göstərməyi bacardı. Azerisport.az xəbər verir ki, gənc qolkiper komandasını oyun boyu bir neçə real qol vəziyyətində xilas etməklə, hesabın daha böyük olmasına imkan vermədi.
"Kəpəz"də rəsmi debütü ilə bağlı klub saytına danışan qapıçı start heyətində yer almasının gözlənilməz olduğunu bildirib: "Komandamızda üç qapıçı var. Əsas "çərçivə” qoruyucumuz Xəyal Zeynalovdu. Bu səbəbdən AZAL-la oyundan öncə keçirilən iclasda baş məşqçimiz Mahmud Qurbanovun meydana çıxacaq oyunçular arasında adımı çəkməsi gözlənilməz oldu. Amma mən hər zaman oynamağa hazır olmuşam. Məncə, debütüm pis alınmadı. Komandaya kömək edə bildim. Biz gənclər təcrübə sarıdan əziyyət çəkirik. Ona görə istənilən kimi mübarizə apara bilmir və uduzuruq".
"Mən əvvəllər "Turan"ın heyətində çıxış etmişəm. Tovuz təmsilçisində 5 oyunda əsas heyətdə meydana çıxmışam. Yəni demək istəyirəm ki, azda olsa, elita təcrübəm var. Mövsümün ilk yarısında şərəfini qoruduğum "Tərəqqi"də isə 12 matçda oynamışam. Ehtiyatda oturmamışam, oyun təcrübəsi qazanmışam. Bütün bunlar mənə kömək oldu. Amma hələ çox çalışmalıyam ki, daha yaxşı oyun sərgiləyim".
Qapıçı qarşıdakı turda meydana çıxıb-çıxmayacağına əmin olmasa da, "Kəpəz"ə meydanda kömək etmək istədiyini vurğulayıb: "Əsas məqsəd həmişə oynamaq, heyətdəki yerimi qorumaqdı. Dəqiq deyə bilmərəm ki, "Simurq"a qarşı görüşdə oynayacağam, ya yox. Bu, baş məşqçidən asılı olan məsələdi. O, kimi istəsə, daha uyğun və hazır bilsə, o da qapıda duracaq".
