Xəzər Lənkəranın Sumqayıtla 4-cü dueli

Topaz Premyer Liqasının 22-ci turunda “Xəzər Lənkəran” “Sumqayıt”ı qəbul edəcək. Azerisport.az xəbər verir ki, təsnifat mərhələsinin son turunun qarşılaşması rəqiblər arasında 4-cü duel olacaq.

 

İndiyədək Azərbaycan kubokunda üz-üzə gəlməyən komandalar yalnız Premyer Liqada qarşılaşıb.

 

“Gənclik şəhəri” təmsilçisi ölkə çempionatının ən gənc komandalarından biri olduğundan “Xəzər Lənkəran” bu rəqiblə ilk dəfə ötən mövsüm görüşüb. Həmin vaxt hər 2 qarşılaşmada XL qalib gəlib. Hər dəfə 3 qolun vurulduğu matçlarda cənublu futbolçular rəqibinə xal verməyib.

 

Cari mövsümün ilk dövrəsində isə Sumqayıt təmsilçisi ilk dəfə “Xəzər Lənkəran”dan xal almağı bacarıb. Hər 3 qarşılaşmada rəqibinin qapısına qol vuran “Xəzər Lənkəran” bu matçlarda rəqibinə uduzmayıb. Hesabında 2 qələbə və 1 heç-heçə olan XL rəqib qapısına 6 qol vurub. “Sumqayt” isə 3 matçda cəmi 2 dəfə qol sevinci yaşayıb.