3 mart 2013 11:00
22-ci tur Abdullayevin gözü ilə
Futbol mütəxəssisi Oqtay Abdullayev futbol üzrə Azərbaycan Premyer-liqasının 22-ci turu çərçivəsində baş tutacaq oyunlar barədə azerisport.az-a şərh verib.
KƏPƏZ - SİMURQ
Güman edirəm ki, burada xüsusi variantlar yoxdu. “Simurq” ilk “altılıq”da yerini təmin etsə də, xal yığmaq lazımdı. Düşünmürəm ki “Kəpəz” “Simurq”a müqavimət gücündə olsun. “Simurq” 3 xalı götürəcək.
RƏVAN - BAKI
Bu, “Bakı”nın ilk “altılığ”a düşmək üçün son şanslıdı və düşünmürəm ki onlar bu imkanı əldən versinlər. “Rəvan” yaxşı komanda olsa da, çempionatda artıq heç nəyə iddialı deyil. Hər hansı məqsəd üçün mübarizə səbəbi yoxdu. Bu planda “Bakı” daha motivasiyalıdı.
XƏZƏR-LƏNKƏRAN - SUMQAYIT
“Xəzər-Lənkəran”ın vəziyyəti “Bakı” ilə oxşardı. Ancaq şansları daha azdı. İstənilən halda cənublulara qələbə lazımdı. Ümumilikdə Lənkəran komandası daha güclü olacaq. Qələbə “Xəzər-Lənkəran”ın olacaq.
TURAN - NEFTÇİ
Tovuz komandasının son vaxtlar yaxşı oyun sərgiləməsinə baxmayaraq onların “Neftçi”ni dayandıra biləcəyinə inanmıram. Bakılılar dövrəyə düşüblər, onlar yüksəlişdədirlər və mütəmadi olaraq xallar yığırlar. “Neftçi” qalib gələcək.
AZAL - QƏBƏLƏ
Çox ağır, çətin oyun olacaq. “Qəbələ” ilk “altılıq”da olsa da, AZAL bura düşmək əzmindədir. Məhz buna görə çətin, maraqlı oyun gözlənilir. Həmçinin AZAL-ın şansları birbaşa özündən asılı deyil. “Bakı” və “Xəzər-Lənkəran”ın oyunlarının nəticələri də buna təsir göstərəcək. Bu komandaların hər ikisi xal itirərsə, AZAL qalib gələcəyi təqdirdə məhz onlar ilk “altılığ”a vəsiqəni təmin etmiş olacaqlar. Düşünürəm ki, bütün bunlara baxmayaraq bu oyun heç-heçə başa çatacaq.
QARABAĞ - İNTER
Qələbə qazanacağı halda “Qarabağ” ikinci sıraya yüksələcək. Çətin ki “İnter” rəqibə bu şansı asanlıqla versin. Döyüşkən oyun olacaq. Hər iki komanda qələbəyə oynayacaq. Ancaq mən heç-heçə olacağını düşünürəm.
