4 mart 2013 18:35
“Özümü xilaskar saymıram”
“Qarabağ” sonuncu turda “İnter”lə bərabərliyə razılaşaraq təsnifat mərhələsini 3-cü sırada bitirdi. Azerisport.az xəbər verir ki, Ağdam klubu önəmli qarşılaşmaya ciddi itkilərlə çıxmışdı.
Ansi Aqolli cəza, Riçard Almeyda, Branimir Subaşiç, Kristian Torres zədə, Emeka Opara isə hazır olmadığına görə “bankirlər”lə oyunda meydana çıxa bilmədi. Belədə çoxlarının gözləmədiyi halda komandanın baş məşqçisi Qurban Qurbanovun Toğrul Bilallıya start heyətində yer verdi.
“Qarabağ”ın 20 yaşlı yetirməsi 45 dəqiqə meydanda qalsa da, xüsusilə hissənin sonlarına yaxın həyəcanını atdığı diqqət çəkirdi. Toğrul bu münasibətlə təəssüratlarını bölüşüb:
“Deməzdim ki, xüsusi bir həyəcanım vardı. Təbii ki, “İnter”lə oyun olduğuna görə bir qədər fərqlilik vardı. Turnir cədvəli baxımından oyun vacib idi. Görüşdən qabaq Qurban müəllim nə dedi? Bildirdi ki, rahat ol, təlim-məşq toplanışında oyunlara neçə çıxırdınsa, eyni tərzdə meydana çıx. Dedi ki, mümkün qədər Vüqar və Əfranın sürətindən istifadə et. Onları topla təmin etməyimi istədi. İlk hissədən sonra Qurban müəllim mənə təşəkkür etdi. Oyunuma qiymət verməyim düzgün olmaz. İlk hədəfim daha çox oynamaq şansı qazanmaqdı. Meydanın mərkəzində, hücumçuların arxasında oynamaq mənə daha xoşdu. Avropada bu mövqedə oynayanlardan Xavi, İnyestadan xoşum gəlir. Yox, komanda yoldaşlarım ona görə məni “İnyesta” çağırmırlar (gülür). Bəlkə də onun kimi sakitəm və onun kimi qol vurmaqdan daha çox ötürmə verməkdən xoşum gəlir. Azərbaycanda isə Rəşad Sadiqov “Qarabağ”da oynayarkən mənə nümunə olub. Futbolumuzda pleymeyker probleminin olub-olmadığını deyə bilmərəm. Özümü xilaskar saymıram. Mənim futbol istəyim, daha sadə futboldu: daha çox ötürmə və komanda naminə oynanılan futbol”.
