5 mart 2013 19:18
“Sübut edəcəm ki, Kalonas hələ ölməyib”
Xəbər verdiyimiz kimi, "Rəvan”ın qış "transfer pəncərəsi”ndə heyətinə qatdığı futbolçulardan Mindauqas Kalonas milliyə dəvət alıb. Azerisport.az xəbər verir ki, litvalı hücumameyilli yarımmüdafiəçi bu münasibətlə klub saytına danışıb.
Təxminən 1 ay öncə klubun rəsmi saytına müsahibəsində "Məni hesabdan silmək hələ tezdi. Ən yaxın zamanlarda yığmaya dönmək istəyirəm. Artıq yaxşı forma yığmışam və karyeramda yeni səhifəyə başlamağa hazıram. "Rəvan”da özümü yaxşı tərəfdən göstərə bilsəm, artıq bir neçə aydan sonra milliyə qayıda bilərəm” deyən Kalonas öz oyunu ilə bu müddəti lap qısaltdı.
Uzun fasilədən sonra milliyə dəvət alması ilə bağlı Kalonasın fikirlərini öyrəndik: "Əlbəttə ki, çox sevinirəm. 2 il yarım sizə zarafat gəlməsin. Hər şey Zaporojye "Metallurq”unda yaşadığım problem və bu səbəbdən 1 ilə yaxın oynaya bilməməyimlə başlamışdı. Çox sevinirəm ki, artıq bu qara zolağı arxada qoya bildim. Milliyə dəvət almağımda "Rəvan”ın da danılmaz rolu var. Rəhbərliyə və məşqçilər korpusuna mənə etimad göstərdiklərinə görə təşəkkür edirəm. İndi Litva millisində həm də klubun nümayəndəsi kimi çıxış edəcəm. Həm özümün, həm də klubun imicini qaldırmaq üçün əlimdən gələni edəcəm. Sübut edəcəm ki, Kalonas hələ "ölməyib”, futbol oynamağı bacarır. Sadəcə, ona şans vermək lazımdı”.
