5 mart 2013 19:30
Rəvan Xəzər Lənkəranla matçın hazırlıqlarını tamamladı
"Rəvan” Azərbaycan Kubokunun cavab 1/4 final matçı üçün hazırlıqlarını davam etdirir. Azerisport.az xəbər verir ki, komanda "Xəzər Lənkəran”la səfərdə keçirəcəyi görüş ərəfəsində bu gün "Bayıl Arena”da son məşqinə çıxıb.
Qeyd edək ki, bazar günü "Bakı” ilə Topaz Premyer Liqası çərçivəsində qarşılaşan "Rəvan” artıq bazar ertəsindən kubok oyununa hazırlaşır. Başqa sözlə, futbolçulara bu sıx qrafikdə istirahət verilməyib. Dünən "Bakı” ilə matçda oynayanlar "bərpa prosesi” keçmişdisə, bu gün bütün komanda tam məşq edib. İsinmə hərəkətlərindən sonra futbolçular fiziki hazırlıq üzərində çalışıb. Necə də olmasa, son oyunlarda hesabı açsaq da, sonradan rəqib təşəbbüsə yiyələnib hesabı öz xeyrinə dəyişə bilir. Məşqçilər bu yolla futbolçularda fiziki dözümlülüyü daha da artırmağı düşünür. Nəzərə alaq ki, kubok matçında əlavə vaxt və hətta penalti seriyası da ola bilər. Deməli, son dərəcə dözümlü və səbirli olmaq lazımdı.
Məşqin ikinci hissəsi taktiki-texniki hazırlığa həsr edildi. Qapıya zərbələr, cərimə zərbələrinin yerinə yetirilməsi, dar sahədə ani ötürmələr üzərində çalışdıqdan sonra futbolçular meydanda daha 2 dəfə dövrə vurub məşqi bitirib.
Qeyd edək ki, bu, "Xəzər Lənkəran”la kubokun cavab matçı öncəsi Bakıdakı son hazırlığımız idi. Çünki sabah səhər tezdən komanda Lənkərana üz tutacaq və növbəti məşqi oyunun baş tutacağı Lənkəran şəhər mərkəzi stadionunda həyata keçirəcək.
