7 mart 2013 16:53
“Bu, Anar Salmanov üçün gələcəyə açılmış bir pəncərədi”
Peşəkar Futbol Liqasının prezidenti Ramin Musayev hakim Anar Salmanovun UEFA–nın istedadlar qrupunda mentoru olan Konrad Plautzla görüşüb. Azerisport.az xəbər verir ki, Konrad Plautz bu gün keçirilən Azərbaycan kubokunun 1/4 final mərhələsinin “İnter” – “Bakı” cavab görüşündə Anar Salmanovun hakimliyini izləyəcək.
Axırıncı dəfə 1996-cı ildə Bakıda olduğunu bildirən Konrad Plautz dünən axşam Bakını gəzdiyini və şəhərimizin çox gözəl olduğunu bildirib.
Konrad Plautz Anar Salmanovla bağlı fikirlərini də bildirib: “Onu ilk dəfə gördüyümdən indiyə kimi çox böyük irəliləyişə nail olub, yerində saymayıb, öz üzərində çalışır və tapşırıqlarımı yerinə yetirir. İlk dəfədi ki, Azərbaycana mentor proqramı çərçivəsində nümayəndə gəlir, bu, sizin xeyrinizədi. Burada gördüklərimi Mark Battaya, Pyerluici Kollinaya və Jozef Markoya məruzə edəcəm. Bu, Anar Salmanov üçün gələcəyə açılmış bir pəncərədi”.
Görüşün sonunda Ramin Musayev və Konrad Plautz bir-birinə xatirə hədiyyələrini təqdim ediblər.
