12 mart 2013 00:37
“Hər bir futbolçunun taleyi növbəti oyunlardakı çıxışından asılı olacaq”
AZAL-ın klubdaxili iclası keçirilib. Azerisport.az xəbər verir ki, komandanı üzvləri – məşqçilər, futbolçular və texniki heyətinin iştirakı ilə keçirilən iclasın məqsədi milli çempionatın təsnifat mərhələsində komandanın çıxışına, məşqçi və futbolçu heyətinin fəaliyyətinə qiymət verilməsi və ikinci altılığın oyunları ərəfəsində klubun problemlərinin müzakirəsi olub.
AZAL-ın vitse-prezidenti Fikrət Hüseynov mövsümün əvvəlində komandanın qarşısına ciddi hədəflərin qoyulduğunu bildirərək bu vəzifələrin yerinə yetirilmədiyini əsalandırıb: “Artıq çempionatın ilk hissəsi başa çatıb. Bu səbəbdən öz işimizə qiymət vermək imkanımız var. Mövsümün əvvəlində qarşımıza öncə ilk 6-lığa düşmək, daha sonra mükafatlar uğrunda mübarizə aparmaq məqsədi qoyulmuşdu. Klub rəhbərliyi də bütün planlarını buna uygun hazırlamış, komandanın fəaliyyətinin yaxşı təşkil olunması üçün imkanlar səfərbər olunmuşdu. Təlim-məşq toplanışları, futbolçu transferləri, gündəlik məşqlər, futbolçuların məişət problemlərinin həlli ilə bağlı da heç bir çətinlik olmadı. Komandanın hər bir üzvü rəhbərliyin qayğısını hiss etdi. Mövsümə də uğurlu start verdik, ilk 6 oyundan sonra AZAL turnir cədvəlinə başçılıq edirdi. Amma təəssüf ki, biz bunu nəinki qoruya bildik, hətta bəzi oyunlarda qazanılan arzuolunmaz nəticələrlə rəhbərliyin və məşqçilərin əziyyəti hədər getdi. Nəticədə bu gün biz özümüzə layiq olmayan yerdəyik və ikinci 6-da mübarizə aparacağıq. Deməli, siz qarşıya qoyulan vəzifəni yerinə yetirə bilmədiniz. Burada isə hər bir futbolçunun günahı var və bunlardan nəticə çıxarmalısınız”.
Daha sonra komandanın baş məşqçisi Vaqif Sadıqov hesabat xarakterli məruzə ilə çıxış edərək indiyədək görülən işlərə toxunub. Baş məşqçi də rəhbərliyin qayğısını önə çəkərək komandasına inandığını bildirib: “AZAL-da işləmək, yüksək nəticələr qazanmaq üçün hər cür şərait var. Klub rəhbərliyi baş məşqçi kimi mənim bütün tələblərimi yerinə yetirib. Bizim həm də yaxşı kollektivimiz var və hamımız eyni məqsəd uğrunda birləşmişdik. Mən bir neçə dəfə də demişəm, öz komandamla fəxr edirəm. Bununla belə, bu duruma görə günahı özümüzdə axtarmalıyıq. Bəzi futbolçuların işə qeyri-peşəkar yanaşması, bəzilərinin səhlənkarlığı ümumi nəticəyə və kollektivin əhval-ruhiyyəsinə təsir etdi. Ona görə də bundan sonra əsas tələb sizin qarşınıza qoyulacaq. Hər bir futbolçunun taleyi qarşıdakı oyunlarda çıxışından asılı olacaq”.
AZAL-ın vitse-prezidenti Fikrət Hüseynov daha sonra “6-lıq” oyunları ilə bağlı fikirlərini söyləyib: “Artıq yeni mərhələ başlayır. Biz bütün uğursuzluqları unudub qarşıdakı oyunlarda hər şeyin təsadüf olduğunu sübut etməliyik. Faciəvi heç nə baş verməyib. Rəhbərlik yenə də sizlərə etimad göstərir və bütün problemləri aradan qaldırmağa hazırdır. Mövsümün sonunda biz bir daha işimizə qiymət verib nəticə çıxaracağıq. İstəyirik ki, hər bir futbolçu həm komandanın, həm də öz nüfuzunu qorusun. Sizin buna gücünüz çatar. Bu oyunlarda komadamıza ancaq qələbə arzulayırıq”.
Sonda AZAL-ın bəzi futbolçuları – Cahangir Həsənzadə, Viktor İgbekoyi, Zohair Benouahi söz alaraq öz fikirlərini bildiriblər. Komandada 4-cü mövsümü keçirən Viktor İgbekoyi rəhbərlik və azarkeşlərdən üzr istəyib: “Biz bu duruma görə rəhbərlikdən azarkeşlərdən üzr istəyirik. Sizdən xahiş edirik ki, bütün bunlara rəğmən yenə də bizə inanasınız. AZAL-ın yaxşı məşqçiləri, futbolçuları var. Problemlərimizi bilirik və qarşıdakı oyunlarda hər şeyi unutduracağıq.”
Kapitan Cahangir Həsənzadə isə komandanını qarşıya qoyulan məqsədləri yerinə yetirmədiyini etiraf edib bu vəziyyətin AZAL-in gücünü göstərmədiyini söyləyib.
Mərakeşli Zohair Benouahi isə deyib: “Uğursuzluğun səbəbini məşqlərdə, keçirilən oyunlarda axtarmamalıyıq. Hamı necə hazırlaşdığımızı, məşq etdiyimizi bilir. Məşqlərin necə peşəkarcasına keçirildiyini də görürük. İşimiz bəlkə də hamıya nümunədir. Amma nəticə başqadır. Fikrimcə əsas səbəb meydançadan kənar davranışımızdı. Görünür özümüzə qarşı təlbkar deyilik. Bu nöqsanı aradan qaldırmalıyıq”.
