11 mart 2013 15:50
Şəfa stadionunda da kameralar quraşdırıldı
“İnter” “InStat Football” şirkətilə fəal əməkdaşlığını davam etdirir. Azerisport.az xəbər verir ki, paytaxt klubu futbolun sistemli və dərin analizində ixtisaslaşan bu şirkətlə artıq iki ildir əməkdaşlıq edir.
“InStat Football” dünyanın 20-dən artıq futbol turnirini araşdıran beynəlxalq innovasiya şirkətidi. Bu şirkət sayəsində futbol klubları təkcə komandaları haqqında deyil, həmçinin bütün rəqibləri barədə də müfəssəl məlumatlar alır.
“İnter”in “InStat Football” şirkətilə əməkdaşlığı 2011-ci ilə təsadüf edir. Ötən müddət ərzində şirkət bu komandanın keçirdiyi bütün oyunların ətraflı xarakteristikasını təqdim edir. İndi isə tərəfdaşlıq yeni səviyyəyə keçir. Belə ki, “Şəfa” stadionunda xüsusi kameralar quraşdırılıb və bu kameralar sayəsində futbolçuların fiziki aktivliyinin və göstəricilərinin ətraflı analizini əldə etmək mümkün olacaq. Qeyd edək ki, futbolçuların kilometrajının və aktivliyinin hesablanması klubun hər ev matçında həyata keçiriləcək.
Əlavə edək ki, 2007-ci ildə təsis edilən “InStat Football” şirkətinin tam olmayan 5 il ərzində 70-dən çox klubla əməkdaşlıq münasibətləri var. Şirkət Moskva şəhərində yerləşir, tərəfdaşları Hollandiyada, Rumıniyada, Braziliyada, Sloveniyada, Çex Respublikasında və digər ölkələrdə fəaliyyət göstərirlər. “InStat Football” şirkəti Müstəqil Dövlətlər Birliyi ölkələrində və Şərqi Avropa ölkələrinin əksəriyyətində peşəkar futbol analizi bazarında liderdir. Şirkət biznesini Qərbi Avropa, Asiya və Amerika ölkələrində də fəal şəkildə genişləndirir.
