12 mart 2013 18:19
Böyükağa Hacıyev havanı bəhanə gətirdi
“Neftçi”nin baş məşqçisi Böyükağa Hacıyev Topaz Premyer Liqasının 23-cü turunun “Bakı” ilə oyununu şərh edib. Azerisport.az xəbər verir ki, paytaxt təmsilçisinin çalışdırıcısı 1:1 hesabıyla başa çatan görüşdən sonra bunları dilə gətirib:
“İstədiyimiz baxımlı oyunu göstərə bilmədik. Hava şəraiti də müəyyən qədər oyuna təsir etdi. İki fərqli hissələr izlədik. “Bakı” hesabda geri olduğundan ikinci hissədə daha çox hücuma atıldı. Bizim futbolçular həm müdafiədə, həm də hücumda hava ötürmələrindən istifadə edirdilər. Onlara isə ötürmələri yerlə verməyi tapşırmışdım. Cavid İmamverdiyev oyuna əvəzetmədən daxil olsa da, heç nə ilə yadda qalmadı və zədələndi. Elvin Yunuszadəyə Marius Penaya qarşı diqqətli oynamağı tapşırmışdım, onun başla yaxşı oynadığını demişdim. Qarşıda 18 günlük fasilə olacaq, 10 futbolçumuz milli komandalara yollanacaq. Dünyanın aparıcı ölkələrində milli komandanın toplanışı üç gün olur, bizdə isə 18 gün”.
