12 mart 2013 13:33
Rəvan Xəzər Lənkəranla matça itkisiz çıxacaq
"Rəvan” bu gün "Xəzər Lənkəran” ilə üz-üzə gələcək. Azerisport.az xəbər verir ki, komanda ötən gün səhər məşqi ilə oyuna hazırlığını başa vurub.
Qeyd edək ki, kubok matçından sonra cümə günü istirahət edən futbolçular şənbə günündən hazırlıqlara başlayıb. İlk məşqdə Lənkərandakı matçda əsas heyətdə yer alanlar bərpa məşqi ilə kifayətlənibsə, qalanları tam yüklənmə ilə hazırlaşıb. Bazar günü və ötən gün baş tutan məşqlərdə isə bütün komanda tam hazırlıqda iştirak edib. "Bayıl Arena”da baş tutan məşqlərdə futbolçular iki saat yaxın müddətdə verilən tapşırıqları yerinə yetirib, çatışmayan cəhətlər üzərində işləyiblər.
Baş məşqçi Ramil Əliyevi sevindirən məqamlar da yox deyil. Birincisi, "Xəzər Lənkəran”la kubok görüşünü zədə səbəbi ilə buraxan Samuel Barlay sıraya dönüb. İkincisi, "Qarabağ”la oyunda yarıtmaz idarəçiliyi ilə haqlı tənqidlərlə üzləşən Elçin Məmmədovun qırmızı vərəqə göstərdiyi Miloş Adamoviçin cəzası başa çatıb. Bu isə o deməkdir ki, "Xəzər Lənkəran”la çempionat oyununa komanda itkisiz çıxacaq.
