13 mart 2013 18:17
Rəvanın daha bir futbolçusu milli komandaya dəvət aldı
Mindauqas Kalonasın Litva yığmasına çağrılmasından sonra "Rəvan” futbol klubunun daha bir üzvü çıxış etdiyi millidən dəvət alıb. Azerisport.az xəbər verir ki, “aslanlar”ın "18” nömrəsi Samuel Barlay Syerra Leone yığma komandasında oynayacaq.
2010-cu ildən Azərbaycanda legioner həyatı yaşayan 26 yaşlı yarımmüdafiəçi isveçli baş məşqçi Lars-Olof Mattssonun daim diqqət mərkəzində saxladığı futbolçulardandı. Bu səbəbdən onun növbəti dəfə millisinə dəvət almasında təəccüblü heç nə yoxdu.
Qeyd edək ki, Syerra Leone milli komandası martın 23-də 2014-cü ildə Braziliyada keçiriləcək dünya çempionatının seçmə turniri çərçivəsində səfərdə Tunis yığma komandası ilə qarşılaşacaq. Məhz bu 2 komandanın B qrupunda DÇ-nin final mərhələsinə vəsiqə verən 1-ci yer uğrunda vuruşduqlarını da bildirək. Hələ ki 2 turdan sonra Tunisin hesabında 6, Syerra Leonenin aktivində isə 4 xal var.
