14 mart 2013 17:17
Rail Məlikov: Artıq tövbə etmişəm
Türkiyənin “Denizlispor” klubunun azərbaycanlı müdafiəçisi Rail Məlikov bir neçə tur komandasına kömək edə bilmədiyinə görə günahı özündə görür. Azerisport.az xəbər verir ki, PTT Birinci Liqanın 20-ci turunun “Adana Demirspor”la oyununda qırmızı vərəqə almaqla həm komandasını çətin vəziyyətdə qoyan, həm də üç oyunluq cəza alan həmyerlimiz keçirdiyi bu çətin dövrlə əlaqədar yerli mətbuata açıqlama verib.
Bu üzdən üç oyunu məcburi buraxan Məlikov “Boluspor”la qarşılaşmanı xəstəliyi üzündən buraxdı. Son turda isə “Rizespor”la oyunu sonadək ehtiyatdan izləyən futbolçumuz bundan dərs çıxardığını bəyan edib: “Hakimlə lazımsız bir dialoq üzündən 5 turdu forma geyə bilmirəm. Artıq tövbə etmişəm. Oyun zamanı nə hakimə, nə rəqib oyunçuya ağzımı da açmayacağam”.
Müdafiədəki yerini önce Hüseynə, sonra da Hasan Demirə verən Məlikov əvvəlkindən də çox çalışmaq məcburiyyətində qaldığını etiraf edib: “Komanda yoldaşlarımla yaxşı rəqabət yaratmışıq. Yenidən heyətə dönmək üçün çox çalışıram”.
